લતા હિરાણી ~ સાદ કરું ત્યાં * Lata Hirani
સાદ કરું ત્યાં હરિ આવીને આગળ ડગલું ભરે
પગલે પગલે દીવો થઈને સંગાથે સંચરે
મારી આંખો ખરખર ખરે……
વાતે-વાતે વાંધા વેરી, વાતે-વાતે મરી
પોથી-પુસ્તક શાસ્તરની મેં શોભા ભીંતે કરી
અણસમજથી કર્યા ઉધામા, રહી રહીને આછરે
મારી આંખો ખરખર ખરે……
ઓછાબોલી હું અટવાતી, હરિએ હામી ભરી
ખૂબ ઉકાળી, ગાળી, ચાળી ; આખરમાં હું ઠરી
બાથ ભરી છે સાવ ભરોસે, ભવબાધા પરહરે
મારી આંખો ખરખર ખરે…
– લતા હિરાણી
કવિને તો એની રચના ગમે જ પણ નમ્રતાબહેનને ગમી અને એમને એનું સ્વરાંકન કરીને ગાઈ એ વિશેષ ગમ્યું. આભાર આભાર…
આ ગીત નમ્રતાબહેનના મધુર કંઠમાં તમને પણ સાંભળવું ગમશે….
કાવ્યસંગ્રહો 1. ‘ઝળઝળિયાં’ 2. ‘ઝરમર’
7.1.21
કાવ્ય : લતા હિરાણી સ્વરાંકન અને સ્વર : નમ્રતા શોધન
Purushottam Mevada, Saaj
13-04-2021
આદરણિય લતાજી, આપની કવિતા ખૂબજ સુંદર ભગવત્ ભાવમાં છે, અને નમ્રતાજી નું સ્વરાન્કન અને ગાયન પણ મજાનું છે. કવિ શ્રી ગોસ્વામીની ગઝલ ખૂબ ગમી.
પ્રફુલ્લ પંડ્યા
13-04-2021
સાદ કરું ત્યાં હરિ આવીને આગળ ડગલું ભરે… ખૂબ સુંદર ભાવવાહી રચના છે.સાદ પાડતાં જ હરિ આવીને દીવો ધરતાં સાથે સાથે સંચરે છે આ ધટના જ કવિયત્રી સાથે ભાવકનાં અંતરમનને પણ ભરી દે છે.પછી તો બસ ” મારી આંખો ખરખર ખરે ” આ આંસુ હરિ હાજરીની પ્રતિતીનાં છે જેમાં જાત સાથે આત્મા પણ ભીંજાય છે ! હરિ સહવાસની આ ક્ષણો ભાવ- સંવેદનાનાં અનેક વર્તુળો પૂરાં કરીને પ્રભુ વત્સલતાનું ભકતિભાવભર્યુ અજવાળું પ્રકટાવે છે.લતાબેન, ખરેખર સરસ કાવ્ય !
પ્રફુલ્લ પંડ્યા
પ્રતિભાવો