હર્ષા દવે ~ છેલ્લો પ્રવાસ છે * Harsha Dave
છેલ્લો પ્રવાસ છે,
ઘટમાં ઉજાસ છે.
આ ખોળિયું ઘણો,
મોંઘો લિબાસ છે.
જીવન ગઝલનો તું,
અંત્યાનુપ્રાસ છે
કાં તું કશે નથી,
કાં આસપાસ છે.
બે-પાંચ શબ્દનો,
મારો ગરાસ છે.
હસવું રૂદન તણો,
અણઘડ પ્રયાસ છે.
– હર્ષા દવે
ટૂંકી બહરની અને ઊંડી આધ્યાત્મિકતાથી છલોછલ આ રચના તરત ધ્યાન ખેંચે એવી નોંધપાત્ર છે. જાતનું અવલોકન ઘણી ક્ષિતિજો ઉઘાડે છે અને એમાંય જ્યારે એ અંદરની તરફ વળે ત્યારે જે ઉઘાડ થાય, જે અજવાસ પમાય એમાં જીવનપ્રવાસના ઉન્નત શિખરોને ઝળહળતાં ભાળી શકાય. વાણીની કેડીઓ છોડીને મૌનના રાજમાર્ગ પર થતો આ પ્રવાસ છેલ્લો હોય કે મધ્યનો, અંદર ઉજાસ પાથરે છે અને મૂળે તો પ્રવાસની જ મજા છે, પહોંચવાનું ઈશ્વરાધીન છે એ સમજણ અવશ્ય બક્ષે છે. ‘જીવન ગઝલનો તું, અંત્યાનુપ્રાસ છે’ બહુ સરસ પ્રતીકથી કેટલા ઓછા શબ્દોમાં એક ઊંચી વાત કહી દીધી !
31.7.21
Sarla Sutaria
04-08-2021
ટૂંકી બહરમાં ખૂબ ઊંડી વાત કહી ગયા કવયત્રિશ્રી ??
આભાર આપનો
02-08-2021
આભાર છબીલભાઈ, વારિજભાઈ.
‘કાવ્યવિશ્વ’ની મુલાકાત લેનારા સૌ મિત્રોનો આભાર.
છબીલભાઈ ત્રિવેદી
02-08-2021
આજની હર્ષાદવે ની રચના ખુબ સરસ આધ્યાત્મિક વાત ખુબ સરળ શબ્દોમાં કહી આપે આપેલો કાવ્ય સાર પણ ખુબજ અદભુત આભાર લતાબેન
Varij Luhar
02-08-2021
વાહ ટૂંકી બહેર ની સુંદર ગઝલ માણવા મળી
પ્રતિભાવો