રાજેશ વ્યાસ ‘મિસ્કીન’ ~ કૈંકને દુર્લભ છે * Rajesh Vyas
આભાર માન
કૈંકને દુર્લભ છે શ્વાસો, ને મફત વહેતી હવા
શ્વાસ તારાથી સહજ લેવાય છે ? આભાર માન.
કૈંકને મૃત્યુથી બદતર છે પરિસ્થિતી અહીં
ટૂંકમાં બહેતર જીવન જીવાય છે, આભાર માન.
કૈંકને દૃષ્ટિ નથી ન કૈંક જોતાં ધૂંધળું
આંખથી ચોખ્ખું તને દેખાય છે ? આભાર માન.
જ્ઞાનતંતુની બીમારી ને હૃદયની કોઈને
આ જગત સ્પર્શાય છે ? સમજાય છે ? આભાર માન.
કૈંક ઉબાઈ ગયા છે કૈંક પાગલ થઇ ગયા
જીવવાનું મન પળેપળ થાય છે ? આભાર માન.
એક સરખું હશે જો કૈં પણ તો કંટાળી જઈશ
વત્તુઓછું જો હૃદય હરખાય છે, આભાર માન.
જીભમાં લોચા નથી વળતા ન દદડે આંસુ
હોઠ આ ફફડે છે તો બોલાય છે ? આભાર માન.
વ્હેણ સૂકાયા નથી ને અવસરે શોભે હજી
આંસુઓ પણ પાંચમા પૂછાય છે, આભાર માન.
કાલમાં સૌ જીવનારા હોય છે પરવશ ફક્ત
આજે આ આભારવશ થઈ જાય છે, આભાર માંન.
~ રાજેશ વ્યાસ ‘મિસ્કીન’
આ ગઝલ જાણે આજ માટે જ લખાઈ હોય એવું લાગે. કવિને એટલે જ આર્ષદૃષ્ટા કહ્યા છે ને !
સાથે નમ્રતાબહેને કેટલા ભાવથી ગાયું છે !
28.4.21
કાવ્ય : રાજેશ વ્યાસ ‘મિસ્કીન’ * સ્વરાંકન અને સ્વર : નમ્રતા શોધન
***
દીપક વાલેરા
02-05-2021
ખૂબ સુંદર ગઝલ અને એથી સુંદર સ્વરાંકન બેઉ સર્જક ને અભિનંદન શુભેચ્છાઓ
Devika Dhruva
30-04-2021
વાહ અને આહ…
ડો. પુરુષોત્તમ મેવાડા, સાજ
28-04-2021
‘મિસ્કીન’ ની ગઝલ જે મળ્યું છે તે પરખીને કિંમત કરીને, હાલની મળેલી ક્ષણને માણવાની વાત એમની આ ગઝલમાં સરસ રીતે કરી છે.
કાજલ સતાણી “મીરાં”
28-04-2021
આ ગઝલ માટે શ્રી રાજેશ સાહેબનો વંદનસહ આભાર માનુ છુ…તાદ્રશ્ય વર્ણન..કોરોનાકાળની વિહવળ દશામાં શ્વસાતા પ્રત્યેક શ્વાસ માટે ઈશ્વરનો આભાર માનવો જ રહ્યો…
VIPUL
28-04-2021
Befitting in present situation.
HOPE FOR GOOD TIME.
અદભૂત રચના આભાર માન મિસ્કીન સાહેબ