તુષાર શુક્લ ~ આંખોમાં બેઠેલા * Tushar Shukla
આંખોમા બેઠેલા ચાતક કહે છે મારું ચોમાસું ક્યાંક આસપાસ છે,
ગાલો પર લજ્જાની લાલી ફુટ્યાનું કોઈ કારણ પુછે તો કહું ખાસ છે !
કોરી કુંવારી આ હાથની હથેળીમાં માટીની ગંધ રહી જાગી
તરસ્યા આ હોવાના કોરા આકાશમાં આષાઢી સાંજ એક માંગી
વરસાદી વાર્તાઓ વાંચી વાંચીને હવે ભીજાવું એ તો આભાસ છે
ગાલો પર લજ્જાની લાલી ફુટ્યાનું કોઈ કારણ પુછે તો કહું ખાસ છે !
કોરપની વેદના તો કેમેય સહેવાય નહીં, રુંવે રુંવેથી મને વાગે
પહેલા વરસાદ તણુ મધમીઠું સોણલું રહી રહીને મારામાં જાગે
નસનસ આ ફાટીને વહેવા ચાહે છે આ તો કેવો અષાઢી ઉલ્લાસ છે
ગાલો પર લજ્જાની લાલી ફુટ્યાનું કોઈ કારણ પુછે તો કહું ખાસ છે !
આંખોમા બેઠેલા ચાતક કહે છે મારું ચોમાસું ક્યાંક આસપાસ છે
ગાલો પર લજ્જાની લાલી ફુટ્યાનું કોઈ કારણ પુછે તો કહું ખાસ છે !
~ તુષાર શુક્લ
યુવાપેઢીને પણ ગમે એવા પ્રણયગીતો જેમની કલમેથી વહ્યાં છે એવા કવિ તુષાર શુક્લનું આ ગીત
કવિના જન્મદિવસે વંદન સહ
સાંભળો આ ગીત આરતી મુનશીના સ્વરમાં. સૌજન્ય : આલ્બ્મ : હસ્તાક્ષર
કાવ્ય : તુષાર શુક્લ સ્વર : આરતી મુન્શી સંગીત : નયનેશ જાની
OP 29.6.22
*****
સાજ મેવાડા
01-07-2022
ખૂબજ સુંદર ગીત અને ગાયન, આનંદ.
વિવેક મનહર ટેલર
29-06-2022
સમયાતીત રચના અને અદભુત સ્વરાંકન અને ગાયકી…
છબીલભાઈ ત્રિવેદી
29-06-2022
ખુબ સરસ ગીત અને અવાજ પણ અેટલોજ મધુર જન્મદિવસ ની શુભ કામના આભાર લતાબેન
પ્રતિભાવો