મકરંદ દવે ~ માધવ મોરપિચ્છ અવલોકે * સ્વર અમર ભટ્ટ

માધવ મોરપિચ્છ અવલોકે

માધવ મોરપિચ્છ અવલોકે
વાર વાર કંપિત કરથી
ધરતા વિરહાકુલ શોકે

આકુલ અપલક રાધા કેરી
ઝાંખી ઉરે જગાડી
મોરપિચ્છ  મહીં અનુખન
નીરખે અંકિત આંખ ઉઘાડી
ઝીણી ઝલમલ તંતુ તંતુ પર
સોહે સ્વર્ણિમ છાયા,
નયન તરે સંકોચે સરતી
કોમળ કાંચન કાયા

પ્રાણે પૂર્ણ વણાઈ નીલિમા
નિખિલ નીલમણિ  કેરી,
પાગલ નૃત્ય કરી કરી ખરવું
શ્યામ વદનઘન હેરી
મોરપિચ્છ નિજ શિરે લગાવત
ધારી પ્રેમ અગાધા,
માધવ ડોલત વન વન કુંજે
બોલત રાધા! રાધા!

~ મકરન્દ દવે

કાવ્ય ~ મકરન્દ દવે

સ્વરકાર:ગાયક ~ અમર ભટ્ટ