મન માને તો
મન માને તો મળજો
નહિતર નિજમાં પાછાં વળજો
મન માને તો મળજો….
ઝરમર ઝરમર શ્રાવણ વરસે
પહાડો, ખીણો, વૃક્ષો સંતાકૂકડી રમતાં,
મગમગ મગમગ મ્હેકી ધરતી
ખળખળ વ્હેતાં ઝરણાં : માની મમતા.
મીત મળે તો સ્મિત આપજો
ફૂલની ડાળી જેવું લળજો
મન માને તો મળજો …
એકલવાયા ઘરમાં ક્યારે આભ ઊતરશે—?
ઋતુએ ઋતુએ રાહ જોઈએ
સાચું કહું છું : નથી કર્યા એ ગુનાઓની
કરી આકરી સજા કોઈએ…
સહેજ વાર પણ અતીત સાંભરે
દિલનાં દુઃખડાં દળજો
મન માને તો મળજો. …
~ મણિલાલ હ. પટેલ
એક હળવું સરળ ગીત. જો કે બીજા અંતરામાં એ હળવાશ થોડી ભારે બની જાય છે જ્યારે નાયક કહે છે, “સાચું કહું છું : નથી કર્યા એ ગુનાઓની કરી આકરી સજા કોઈએ….” આ કવિતા છે, એની હળવાશ છેતરામણી હોય શકે…. પીડાને ક્યાંકથીયે પ્રગટવું જ હોય છે….
સુંદર અભિવ્યક્તિ 👌👏👏
ગીત અને ગઝલ ખૂબ ખૂબ સરસ..
સંવેદનશીલ ્.
કાવ્યમાં સરળ, લયબંધ શબ્દો ગીત આને ગઝલને કેવું સુંદર પરિણામ આપી શકે તેનો દાખલો દેવા કામ આવે એવી રચનાઓ છે. વાહ.
ગીત અને ગઝલ બંને મનમાં વસી જાય તેવાં સુંદર