નિરંજન ભગત : કાળની કેડીએ * Niranjan Bhagat
કાળની કેડીએ ઘડીક સંગ
રે ભાઈ, આપણો ઘડીક સંગ;
આતમને તોય જનમોજનમ લાગી જશે એનો રંગ !
ધરતી આંગણ માનવીના આ ઘડીક મિલનવેળા,
વાટમાં વચ્ચે એક દી નકી આવશે વિદાયવેળા!
તો કેમ કરીનેય કાળ ભૂલે ના એમ ભમીશું ભેળા !
હૈયાનો હિમાળો ગાળી ગાળીને વહશું હેતની ગંગ !
પગલે પગલે પાવક જાગે ત્યાં ઝરશું નેનની ઝારી,
કંટકપથે સ્મિતવેરીને મ્હોરશું ફૂલની ક્યારી;
એકબીજાને જીતશું, રે ભાઈ,જાતને જાશું હારી !
ક્યાંય ના માય રે આટલો આજ તો ઉરને થાય ઉમંગ !’
~ નિરંજન ભગત
કવિ નિરંજન ભગતે પોતાના મિત્ર કવિ પિનાકિન ઠાકોરને નવા વર્ષની શુભેચ્છારૂપે આ ગીતની પ્રથમ બે પંક્તિ પોસ્ટકાર્ડમાં લખી મોકલેલી.
મૂળ પોસ્ટીંગ 26.10.2020
રચના : નિરંજન ભગત સ્વર : હેમા દેસાઇ, આશિત દેસાઇ સંગીત : આસિત દેસાઇ
પ્રતિભાવો