વ્રજેશ મિસ્ત્રી ~ મજાના શેર * Vrajesh Mistri
મજાના શેર ~ ડો. વ્રજેશ મિસ્ત્રી
ડાબે-જમણે વારા હો જી
શ્વાસો છે કે ભારા હો જી ?**
છે સ્પર્શ ટેરવાં પર થીજેલ આગ જેવા
વર્ષો વીતી ગયાં પણ ઠારી નથી શકાતા. **
બરાબર રંગથી ને રૂપથી એના પરિચિત છું
કહો તો હું તરસનું શિલ્પ આપું હાલ કંડારી. **
રાતભર આંખો ઉલેચી તોય પણ
ભીતરે અંધાર ઓછા ના થયા. **
છે સ્મરણ વેતાલ જેવા એટલે
વિક્રમી આ વારતા રહેશે જ ભૈ **
ડૂબવા દો જાતને તળિયા લગી
તો જ ખપનું કંઈક ઉપર આવશે. **
તું ગઝલરૂપે મળે એ ભાવથી
મેં કલમને જીવમાં બોળી હતી. **
~ ડો. વ્રજેશ મિસ્ત્રી
ડો. વ્રજેશ મિસ્ત્રીનું એમના નવા કાવ્યસંગ્રહ ‘ઝાંઝવાની ભીતો’ સહ સ્વાગત છે. નવભારત સાહિત્ય મંદિર દ્વારા પ્રકાશિત આ સંગ્રહમાંથી ગમેલા થોડાક શેર પ્રસ્તુત છે. આભાર કવિ.
OP 22.6.22
***
Dipak Valera
23-06-2022
ખૂબ સુંદર શેર
વિવેક મનહર ટેલર
22-06-2022
સુંદર સંકલન…
પાણીદાર શેરો…
છબીલભાઈ ત્રિવેદી
22-06-2022
સરસ શેર ખુબ ગમ્યા
પ્રતિભાવો