કાજલ ઓઝા ~ આજે મને

આજે મને ~ કાજલ ઓઝા

આજે મને પહેલીવાર સમજાયું કે

ગોઠવણ એટલે શું?

રંગરોગાન વગરના સંબંધનો ચહેરો

પહેલીવાર ધોધમાર અજવાળામાં,

આંખ સામે ખૂલી ગયો!

તું… જાણે સામે કિનારે

અને તારી આસપાસ નાચતી

નિર્વસ્ત્ર હકીકતોની ભૂતાવળ

આ કિનારે એકલીઅટૂલી હું.

મારા ખિસ્સામાં,

મારી અપેક્ષાઓ, અધિકારોનું ચુંથાયેલું લિસ્ટ

કહેલા-ન કહેલા,

માની લીધેલા શબ્દોના લીરેલીરા!

આંખમાં રેતી ને હોઠ પર ઝાંઝવા,

આપણી વચ્ચેના પુલને

ફુરચેફુરચાં થઇ ઊડી જતો જોઇ રહ્યાં છીએ

આપણે બંને – અસહાય !

~ કાજલ ઓઝા

આખીયે કવિતામાં સંબંધના ભાવપક્ષનો સરસ ઉઘાડ છે. સંબંધના એકએક પડને ખોલતી ને સૂક્કી આંખે તોલતી આ ભાવધારામાં બે વાત બહુ મહત્વપૂર્ણ છે. ‘માની લીધેલા શબ્દોના….’ અને ‘આપણે બંન્ને – અસહાય !…’ આ બે શબ્દાવલિ વગર કદાચ આખી વાત એકાંગી બની રહેવાનો સંભવ રહેત. કાવ્યમાં સંબંધના અંતની કે તૂટવાની વાત તો સ્પષ્ટ જ છે પણ આ શબ્દો દ્વારા કવિએ તૂટેલા સંબંધનેય સમતુલા બક્ષી દીધી છે, ન્યાય આપી દીધો છે. ’માની લીધેલા શબ્દોના’ કહીને દર્શાવ્યું છે કે એકબીજાને સમજવામાં ભૂલ બંને પક્ષે હોઇ શકે… અને એમ જ ’આપણે બંને – અસહાય.’ અર્થાત તૂટવાની પીડા અને લાચારીય બંને પક્ષે… સંબંધનો સેતુ નષ્ટ થયા પછીયે કવિએ સમજણના દોરને સંભાળવાનો પ્રયત્ન કર્યો છે એટલે જ અહીં આક્રોશ છે પણ આરોપ નથી. જે કવિતાના ભાવપક્ષને સમતુલિત કરવાની સાથે સાથે, કાવ્યતત્વને પણ સલુકાઇથી સંભાળી લે છે.

OP 13.7.22

***

આભાર

17-07-2022

આભાર છબીલભાઈ, મેવાડાજી, કીર્તિભાઈ, પ્રફુલ્લભાઈ

‘કાવ્યવિશ્વ’ની મુલાકાત લેનારા સૌ મિત્રોનો આભાર.

સાજ મેવાડા

13-07-2022

આદરણીય કાજલ ઓઝાની આ અછાંદશ આપના કહેવા પ્રમાણે ખૂબજ સહજ રીતે વેદના સાથે ઉભય પક્ષને પણ ન્યાય આપે છે, એમાં કવિયત્રીની ગરીમાપૂર્ણ ખુદ્દારી દેખાઈ આવે છે.

પ્રફુલ્લ પંડયા

13-07-2022

ખૂબ હ્રદયસ્પર્શી અભિવ્યક્તિ! કાજલ ઓઝાએ વધુ કવિતાઓ લખવી જોઇએ. હાર્દિક અભિનંદન!

છબીલભાઈ ત્રિવેદી

13-07-2022

સરસ કાઝલ ઓઝા તેમના દરેક કાવ્ય હોય કે પ્રવચન હમેશા છવાય જાય છે ઉમદા રચના આભાર લતાબેન

Kirtichandra Shah

13-07-2022

Lataben Ape je aasvadya Karyn te Kazal Oza ne batavsho to haju kaink malshe