કમલેશ શુક્લ ~ કાવ્યસંગ્રહ ‘‘નભે આજ સૂરજ અસરદાર લાગે’  * Kamlesh Shukla

કાગળનો અવતાર અમારો, શબ્દ અમારો વેશ
હોય હરખ તો રંગબેરંગી, નહીં તો જીવતા ઢેર*****

આંગણે એ તાપણે તાપી સહજ ચાલ્યા ગયા
તે પછી તો આપણે પણ આગ ઠારી આકરી.*****

રાત લાંબી છે અને ઘેરે બધે અંધાર પણ
આશ તૂટી ને વધ્યો છે આંખ માથે ભાર પણ.*****

સાંજ પડે ત્યાં ડાળી હાલી
કલરવ ઊઠ્યો, ઈશ્વર છે એ.*****

રોજ ઝાકળ બેસવાની છે કથા
સ્પર્શ ભીને ચાહવાની છે કથા*****

ખરે છે રોજ દીવાલો
કથા સૂણી વ્યથાની છે.*****

આંખમાં સંભારણા સૂતાં રહી નિહાળતા
યાદના એ ટૂકડા સીવ્યા કરે એકાંતમાં*****

તું નથી તો આ અગાસી સાવ સૂની લાગતી
સામસામે ખૂલતી બારીએ નાતો હોય છે.*****

પ્રેમ મને હું કરવા લાગ્યો
ઈશ્વર બેઠો દિલમાં ભાળ્યો.*****

સ્પર્શની તો મજા હતી લહેરે
જિંદગીને ગમ્યો કિનારો છે.*****

~ કમલેશ શુક્લ

‘કાવ્યવિશ્વ’માં કવિ કમલેશ શુક્લના કાવ્યસંગ્રહ ‘નભે આજ સૂરજ અસરદાર લાગે’નું સ્વાગત છે.

કમલેશ શુક્લ * ‘નભે આજ સૂરજ અસરદાર લાગે’* સાયુજ્ય 2024