લો કરું કોશિશ
લો કરું કોશિશ ને ફાવે તો કહું,
શબ્દ જો એને સમાવે તો કહું !
આપની નજરો જે ફરમાવી રહી,
એ ગઝલ જો યાદ આવે તો કહું !
શાંત જળમાં એક પણ લહરી નથી,
કોઈ થોડું ખળભળાવે તો કહું !
હું કદી ઊંચા સ્વરે બોલું નહીં,
એકદમ નજદીક આવે તો કહું !
કોઈને કહેવું નથી, એવું નથી,
સહેજ તૈયારી બતાવે તો કહું !
~ રાજેન્દ્ર શુક્લ
આલબમ : ‘કોશિશ’
સંગીત : ગૌરાંગ વ્યાસ
સ્વર : શ્યામલ – સૌમિલ મુન્શી
આદરણીય કવિશ્રી રાજેન્દ્ર શુક્લને જન્મદિવસની હાર્દિક શુભકામનાઓ 🎂🎈
વાહ, બંને ગઝલો ખૂબ જ સરસ. શુભેચ્છાઓ.
કવિશ્રી ને વંદન. કાવ્યોમા અલગારીપણુ ઝલકે છે.