ચંદ્રયાન વિશેષ : ગિરા પિનાકીન ભટ્ટ & તુષાર શુક્લ * Gira Bhatt * Tushar Shukl
ગિરા પિનાકીન ભટ્ટ ~ જાદુ ભર્યો જુવાળ
ચાંદામામા ચાંદામામા, ચૂમવા આવ્યાં બાળ
ભૂમિ તમારી નંદનવન પર, રમશે સહુ ગોપાળ…
દેશ સકળ આ ધરા ઉપરથી, ટપકાવે છે લાળ
ત્યારે ત્રિરંગો ગૌરવ સાથે, ભરતો હરણફાળ …
જગ આખું અચરજથી જોતું , કો’ની ગળી ન દાળ!
છપ્પન ઈંચની છાતીનો છે, જાદુ ભર્યો જુવાળ …
જય જય ભારતના ગુણ ગાશે, આભ અને પાતાળ
સફળ ચંદ્રયાન ત્રણના માથે, દીપે ત્રિરંગી ડાળ…
વેદ-પુરાણો પથરાયાં અહીં ,દેતાં અલૌકિક ભાળ
ઈસરો કેરા ઋષિ-મુનિએ, પકડી પાડી નાળ…
~ ગિરા પિનાકીન ભટ્ટ
સંકલિત સામગ્રી
વિક્રમનું ઉતરાણ ~ તુષાર શુક્લ
ચંદ્રમૌલિ હે ચંદ્રશેખર હે સોમનાથ મહાદેવ
મનુષ્ય યત્ન પર કૃપા ઇશ્વરી ઉતરી દેવાધિદેવ
ચંદ્ર પર વિક્રમનું ઉતરાણ
જગત કરી રહ્યું છે વખાણ
જટામહીં છે ચંદ્ર , સોહે છે શિવજી કેરું રુપ
ચંદ્રયાન ઊતર્યું છે શંભુ સિદ્ધિ છે આ અનુપ
ચંદ્રની ઉપર ચંદ્રયાન ધરી દ્યો દર્શનની લ્હાણ
ચંદ્ર પર વિક્રમનું ઉતરાણ
જગત કરી રહ્યું છે વખાણ
જ્ઞાન અને શ્રદ્ધાનો સંગમ કરે પ્રાર્થના દેશ
દીવો આ વિજ્ઞાનનો દેશે વિશ્વશાંતિ સંદેશ
વિશ્વગુરુ ભારતની સિદ્ધિ, થઇ જગતને જાણ
ચંદ્ર પર વિક્રમનું ઉતરાણ
જગત કરી રહ્યું છે વખાણ
~ તુષાર શુક્લ
સંકલિત સામગ્રી
” કાવ્ય વિશ્વ” વેબસાઇટ તેની વિશિષ્ટ પરંપરા પ્રસ્થાપિત કરી રહ્યું છે.ઉપરાઉપરી સતત બીજા દિવસે પણ ચંદ્રયાન ત્રણ ના ચંદ્ર પરના સફળ ઉતરાણ બાદ આ વિશે લખાયેલાં સુંદર કાવ્યોની પ્રસ્તુતિ થઈ રહી છે તે આનંદ સાથે આપના માટે અભિનંદનની ઘટના છે.ગ ઈ કાલના ઉત્તમ ચંદ્રયાન કાવ્યોમાં પછી આજે શ્રી ગિરાબેન પિનાકીન ભટ્ટ અને તુષારભાઈના સુંદર કાવ્યો વાંચી આનંદ થયો.બંને કવિ સર્જકોને હાર્દિક અભિનંદન !
પ્રફુલ્લ પંડ્યા
ખૂબ આભારી છું પ્રફુલ્લભાઈ.
ગિરિબેન તથા તુષારભાઈ ની રચના ખૂબ સરસ.. સાંપ્રત સમયની અભિવ્યક્તિ છે.
અભિનંદન ્
આપણુ ગૌરવ ચંદ્ર યાન…આપણુ ગૌરવ કાવ્ય વિશ્વ ખુબ ખુબ અભિનંદન
ખૂબ આભારી છું છબીલભાઈ
કાવ્યવિશ્વના નિમંત્રણ એ લખાયેલાં કાવ્યો ગમ્યાં. મિત્રોનો અભિનંદન. લતાબહેનને અભિનંદન, આ મંચ પર પ્રાસંગિક કાવ્યો લખ્યાં છે એ માટે લતાબહેનને ધન્યવાદ આપવા ઘટે.
ખૂબ આભારી છું હસમુખભાઈ