ચાંદ પર આવ્યો જુઓ
ભારત તણો વિશ્વાસ છેવટ ચાંદ પર આવ્યો જુઓ
આનંદનો અવસર અનેરો દિલ મહીં લાવ્યો જુઓ.
સૌ દેશ આજે માનશે ભારત તણી ગૌરવ કથા,
આજે ત્રિરંગો શાનથી લો ચાંદ ફરકાવ્યો જુઓ.
જ્યાં વેદ વાણી ગૂંજતી, આ દેશ છે દેવો તણો,
વિજ્ઞાન સાથે ધર્મ રાખી જગમાં ચમકાવ્યો જુઓ.
આતો હજુ શરૂઆત છે, બાકી ઘણાં આયામ છે
ભરપૂર માનવતા મહીં ભારતને મ્હેકાવ્યો જુઓ.
છે વિશ્વ બંધુત્વ તણી મિશાલ ભારત જોઈ લો
આ એકતાનો ભાવ દિલથી આજ છલકાવ્યો જુઓ.
નાતો હજારો યુગ તણો છે ચાંદ સાથે આપણો
હા, આજ ચંદ્રયાન લઈને ચાંદ પર પહોંચ્યો જુઓ.
~ દિલીપ ધોળકિયા ‘શ્યામ’
સંકલિત સામગ્રી
બન્ને સર્જકની રચનાને વધાવુ છું.
તમામ રચનાઓ ખૂબ જ ઉત્કૃષ્ટ….ખૂબ ખૂબ અભિનંદન સૌ સર્જક મિત્રોને….અને મારી રચનાને સ્થાન આપવા બદલ આભાર…👍👍🌹🌹🙏🙏
બન્ને સર્જકની રચનાઓ ખૂબ સરસ.