હિના મોદી ~ એક સાંજે
એક સાંજે
સાત વર્ષના મારા દીકરાએ
એના ખભા કરતાં લગભગ ડબલ સાઇઝની
સ્કૂલબેગ ખભેથી ઉતારતાં, મને પૂછ્યું –
મમ્મી ! તને ‘ફેઇસ રીડીંગ’ આવડે ?
હું જરા ચોંકી ગઇ
પછી – સ્વસ્થ થઇ મેં પૂછ્યું
’ફેઇસ રીડીંગ’ એટલે શું ?
એ બોલ્યો – જો હું તને શીખવું.
હું એને એકીટશે જોતી રહી
એ સડસડાટ બોલવા માંડ્યો,
આપણે જેની સાથે વાત કરતાં હોઇએ –
એનો ફેઇસ જોવાનો, એની આઇઝ જોવાની
તેથી આપણને ખબર પડે કે –
તે આપણો ફ્રેન્ડ છે કે એનીમી ?
હું ચુપચાપ એની ભોળી આંખો જોતી રહી.
મને એની ભોળી – કુતૂહલ આંખોમાં
અનેક પ્રશ્નોના ખડકલા દેખાયા
મને, એ ખીણમાં પ્રશ્નોનાં ઉત્તરો ખણતો અનુભવાયો.
તો શું..
હું આ ઘટનાને ‘વિશ્વદર્શન’ કહી શકું ?……..
~ હિના મોદી
માતાને માટે બાળકનું આ વિશ્વ સુખનું અને હળવાશનું કેન્દ્ર છે. સમસ્યાઓથી ઘેરાયેલી સ્ત્રીનું માતૃત્વ બાળકમાં ઓતપ્રોત થાય છે ત્યારે એ એક અલગ વિશ્વમાં પહોંચી જાય છે અને એની દુનિયા પણ સંપૂર્ણ અને સુખથી ભરીભરી થઇ જાય છે. બાળકની આંખમાં એ ઇશ્વરને જોઇ શકે છે, માત્ર જોઇ જ નહીં, અનુભવીયે શકે છે !! કદાચ એટલે જ કહેવાયું હશે કે ‘બાળકની આંખમાં બ્રહ્માંડ હોય છે.’ આ વાત આંખમાં તરવરતા ભોળપણની છે, એમાં તગતગતા વિસ્મયની છે. એટલે જ દરેક માતાને પોતાના બાળકમાં કાનુડો, કહો કે ઇશ્વર દેખાતો હશે ! એક નાનકડી વાતને માતાની મમતા, કવિની સંવેદના ઐશ્વરીય સ્તર સુધી પહોંચાડે છે. આ અછાંદસ કાવ્ય સામાન્ય વાતચીતથી શરુ થઇ સ્પર્શી જતા ચિંતનમાં સમાપ્ત થાય છે.
સાભાર : ‘ઊર્મીના આકાશે’ અને ‘ઊર્મીના આકાર’ કાવ્યસંગ્રહો
5.1.21
Kirti Shah
13-04-2021
કવીતા સદા કરુ નાં મયી
Purushottam Mevada, Saaj
13-04-2021
કવિયત્રિ હીના મોદીની કવિતા શીખવા જેવી.
હિના મોદી
13-04-2021
આભાર
માનનીય લતાબેન
કાવ્ય વિશ્વમાં મારા સ્વરરિત કાવ્યને સ્થાન આપવા બદલ.
મારાં અનુભૂતિ વિશ્વને સ્વથી સર્વ સુધી પહોંચડવા બદલ
પ્રતિભાવો