વારિજ લુહાર ~ સૂરજ મળ્યો Varij Luhar

  તડકાની સામે તગતગેલા બાગમાં સૂરજ મળ્યો

ફૂલોએ છેડ્યો રાગ તો એ રાગમાં સૂરજ મળ્યો.

સામે રહીને છેક ભીતર રોજ જે લંબાય છે

એનાંય પાડ્યા ભાગ તો એ ભાગમાં સૂરજ મળ્યો.

ક્યારેક વીંધ્યો વાંસ તો એ વાંસળી બનતો ગયો

ક્યારેક લાગી આગ તો એ આગમાં સૂરજ મળ્યો.

આજેય મારી પીઠ પર દાઝી ગયેલા દાગ છે

શોધ્યું પગેરું દાગનું તો દાગમાં સૂરજ મળ્યો.

સૂરજ વિનાની ધારણા મનમાં હજી જાગી જરા

એનો મળ્યો જો તાગ તો એ તાગમાં સૂરજ મળ્યો.

~ વારિજ લુહાર   

સૂરજ મળ્યો એ રદ્દીફ આખી ગઝલનો સૂર બની જાય છે, મનમાં ઊગી જાય છે….. તમામ બાબતોને એક આશાવાદી સૂરમાં લેવાની, સમજવાની વાત છે ; ભલે એ પીઠ પરના દાગ હોય તો પણ !

30.12.21

***

છબીલભાઈ ત્રિવેદી

31-12-2021

આજની વારીજ સાહેબ ની રચના ખુબ માણવા લાયક રહી સુરજ મળ્યો,, આવી વિવિધ રચના ઓથી કાવ્યવિશ્ર્વ સમ્રુધ્ધ બન્યું છે કવિ શ્રી ને અભિનંદન

સાજ મેવાડા

30-12-2021

ખૂબ સરસ સૂરજ નું કલ્પન રદિફ્માં નિભાવ્યું છે.

Varij Luhar

30-12-2021

આનંદ સહ આભાર

અર્જુનસિંહ.કે.રાઉલજી.

30-12-2021

વાહ વાહ સુંદર કાવ્ય .સૂરજ મળ્યો ..દરેક જગ્યાએ સૂરજ મળ્યો . બી પોઝીટીવ એ માન્યતાને સાર્થક કરતી ગઝલ .અભિનંદન વારીજ લુહાર સાહેબ ..અને લતામેડમને પણ આવી સુંદર ગઝલ રજૂ કરવા બદલ અભિનંદન .કાવ્યવિશ્વ દિવસે દિવસે જામતું જાય છે