ગુલામ મોહમ્મદ શેખ ~ વરસે ફોરાં
વરસે ફોરાં ~ ગુલામ મોહમ્મદ શેખ
વરસે ફોરાં, આજ ફરી પાછાં વરસે ફોરાં,
આજ પ્રિયે ! પાછાં વરસે ફોરાં,
જેમ વિદાયની વેળ ઝમ્યાં’તાં નેણ તારાં બે શામળાં ગોરાં !
આજ ફરી પાછાં વરસે ફોરાં.
કંઠને ભીડી બાથ તારા હાથ વળગ્યા’તા, ભોળી !
ને પગ નીચેની ધૂળમાં કેવી બેઠી હતી તું નેણવાં ઢોળી !
સૌરભભીની રેણ ને આપણા ભીંજતાં’તાં બેય કાળજે-કોરાં !
ઢળું ઢળું તારી પાંપણો જેવી આખરી ટીપું ખાળતાં ચૂકી,
નખરાળી ત્યાં એક સૂકી લટ ઉપરથી જાણે ઝીલવા ઝૂકી !
મૌનનાં ગાણાં ગાઈ થાકેલા હોઠ તારા જ્યાં ઊઘડ્યા કે
મેં હળવે કેવા પી લીધા’તા વેણ-કટોરા !
મનને મારે ખોરડે આજેય ચૂવતી જાણે આંખડી તારી,
(ને) ધીમે ધીમે જાણે વચલી વેળની ધૂળ ધોવાતી જાય અકારી;
આપણો મેળ એ નેણને નાતે
વેણ ઠાલાં શીદ વાપરી કે’વું – આવજો ઓરાં !
~ ગુલામ મોહમ્મદ શેખ
મીઠું મધુર ગીત. કવિને જન્મદિવસે સ્મૃતિવંદન.
16.2.22
***
Dipti Vachhrajani
16-02-2022
વાહ વાહ અતિસુંદર ગીત…
Varij Luhar
16-02-2022
વરસે ફોરાં.. ખૂબ સરસ ગીત..
કવિશ્રી ની શબ્દ ચેતનાને વંદન 🙏
Ingit Chinu Modi
16-02-2022
વાહ
Ingit
16-02-2022
વાહ… મન ને ખોરડે ચુવતી આંખો
સાજ મેવાડા
16-02-2022
વાહ, મોટાં વરસાદનાં ફોરોં જેવાં મિલનનાં આંસું.
છબીલભાઈ ત્રિવેદી
16-02-2022
ગુલામ મોહમ્મદ શેખ નુ કાવ્ય તેમના જન્મદિવસે ખુબ સમયોચિત વરસે ફોરા,,,, કવિ એ ખુબજ ભાવ સભર શેર દ્નારા કાવ્ય ને અેટલુ સરસ રીતે રજુ કર્યું છે કે આપણે તેમા ભીંજાઈ જયીએ ખુબ સરસ
પ્રતિભાવો