શબનમ ખોજા ~ બીજ ભીનું થાય * Shabanam Khoja
બીજ ભીનું થાય ને ફણગો ફૂટે
એમ મારી આંખને દ્રશ્યો ફૂટે !
માના સપનાંને મળે પાંખો નવી ,
દીકરાને મૂછનો દોરો ફૂટે !
છોડ સાથે પીંછું મેં વાવી દીધું
શક્ય છે કે ડાળને ટહુકો ફૂટે !
એમ સપનું સ્હેજમાં તૂટી ગયું
જેમ અડતાંવેત પરપોટો ફૂટે.
એ પછી બહુ જોખમી થઈ જાય છે
માનવી કે કાચ જો અડધો ફૂટે.
મારા લોહીનું એ ગુજરાતીપણું
ટેરવાની ટોચ પર કક્કો ફૂટે !
~ શબનમ ખોજા
ત્રીજો અને પાંચમો શેર ક્યા કહના ! વાહ કવિ….
OP 11.3.22
આભાર
12-03-2022
આભાર આપનો છબીલભાઈ, રમેશચંદ્રજી, મેવાડાજી, કીર્તિચંદ્રજી અને રેખાબેન…
‘કાવ્યવિશ્વ’ની મુલાકાત લેનાર સૌ મિત્રોનો આભાર.
રમેશચંદ્ર મહેશ્વરી
12-03-2022
વાહ વાહ, અદભુત….👌
કવિયત્રીશ્રીની વેદનાને વાચા આપવાની પરાકાષ્ઠા નીચેની પંક્તિઓમાં જોવા મળે છે :-
” એમ સપનું સ્હેજમાં તૂટી ગયું,
જેમ અડતાંવેત પરપોટો ફૂટે. “
રેખા ભટ્ટ
12-03-2022
શબનમ ખોજા ની ગઝલ ખૂબ ગમી. ત્રીજો શેર તો ખૂબ જ ગમ્યો
સાજ મેવાડા
11-03-2022
કવિયત્રી શબનમજી ની ગઝલો નોંખી હોય છે, એવો મારો અનુભવ છે, આ ગઝલ પણ ખૂબ સરસ અર્થો નિપજાવે છે.
Kirtichandra Shah
11-03-2022
Simply beautiful. This Gazal by Shabnam Khoja
છબીલભાઈ ત્રિવેદી
11-03-2022
શબનમ ખોજા ની રચના ના બધા શેર ખુબ સરસ ખુબ સરસ રચના
પ્રતિભાવો