ચંદ્રેશ મકવાણા ~ ટૂંકી ટચરક વાત * Chandresh Makwana
ટૂંકી ટચરક વાત કબીરા ~ ચંદ્રેશ મકવાણા
ટૂંકી ટચરક વાત, કબીરા,
લાંબી પડશે રાત, કબીરા.
અવસર કેવળ એક જ દિ’નો,
વચ્ચે મહિના સાત, કબીરા.
ખુલ્લમખુલ્લી પીઠ મળી છે,
મારે તેની લાત, કબીરા.
કાપડ છો ને કાણી પૈનું,
પાડો મોંઘી ભાત, કબીરા.
જીવ હજીએ ઝભ્ભામાં છે,
ફાટી ગઈ છે જાત, કબીરા.
~ ચંદ્રેશ મકવાણા ‘નારાજ’
‘ટૂંકીટચ’ શબ્દ તો જાણીતો છે પરંતુ ટૂંકી સાથે જોડાયેલ શબ્દ ‘ટચરક’ એ કવિની નીપજ છે જે માધુર્યથી ભરપૂર બની છે એ વિશેષ. ‘ટચરક’ શબ્દનો ધ્વનિ સંગીતમય છે. વાત ચાહે ટૂંકી ટચરક પણ એ સમજાવતાં લાંબી રાત વીતી જાય એમ કહેવામાં કવિએ કમાલ કરી છે કેમ કે આ રાત જિંદગીભર પણ ચાલી શકે. કોઈને ક્ષણમાં જાગૃતિ આવે અને કોઈને જનમોજનમ ઘાંચીના બળદની જેમ ફેરા ફરવા પડે…. એક દિ’ના અવસરમાં સાત મહિનાનો સંદર્ભ કવિ જ સમજાવી શકે પણ છેલ્લો શેર અદભૂત !
કબીર, હરિ, મીરાં – કાવ્યમાં વપરાતા આ બધા લોકપ્રિય શબ્દો. શબ્દો એટલા માટે કે ક્યાંક એ શબ્દો જ બની રહે, ક્યાંક એ ભાવપ્રતિકો બનવામાં સફળ રહે. કવિ ચંદ્રેશ મકવાણાની નીવડેલી કલમે કબીરાને હાજરાહજૂર કર્યા છે, એમાં હેમંત ચૌહાણની ગાયકીથી રંગ ઓર નિખરે છે.
OP 26.3.22
કાવ્ય : ચંદ્રેશ મકવાણા સ્વર : મયુર હેમંત ચૌહાણ
*****
Varij Luhar
27-03-2022
વાહ કબીરા..
સુંદર સ્વરાંકન
છબીલભાઈ ત્રિવેદી
26-03-2022
ચંદ્નેશ મકવાણા નુ કાવ્ય ખુબજ સરસ ટુકુટચ શબ્દ અને છેલ્લે કબીરા અેક નવોજ આયામ ઉભો કરે છે ખુબ સરસ રચના
પ્રતિભાવો