પહેલાં છાંટે ~ મધુસૂદન પટેલ
પહેલાં છાંટે ભુલાઇ જાતાં ચડ્ડી-બંડી,
પડતાં ભેરુ સાદ, યાદ સરવરિયું આવે એ રજવાડું; અહાહાહા!
અમે પાદરે ગામ ગજવીએ અને સીમમાં
બાપુજીને યાદ તૂટેલું નળિયું આવે, એ રજવાડું; આહાહાહા!
રમતાં-રમતાં સાંજ પડે ને ઝાલર વાગે
ઝાંખ વળે ને તોય મજાનો અંત ન આવે એવે ટાણે સામે ચાલી,
મને શોધવા છેક પાદરે માની પાછળ
આખી શેરી, ઘર, તોરણ ને ફળિયું આવે એ રજવાડું; આહાહાહા!
અરે! આંબલી-પીપળી રમતાં પોતીકા આ હાથ ધ્રૂજતા,
જાણીતી એક ડાળ છૂટતાં સામે ફળિયે માળા કરતી-
કંકુ ડોશી પહેલાં બોલે ગાળ પછી
બે કૂવા જેવી આંખે બબ્બે નદિયું આવે એ રજવાડું; આહાહાહા!
અજવાળાને કહી ‘આવજે’, દૂધે વાળું કરીને રાતે
ખુલ્લા ફળિયે તારાની છાબડિયું ભરીએ અને છેવટે
દાદીમાએ તેડાવેલી પરી પાંપણે જરા ઝૂલતાં
અંધારાનું તળિયું આવે એ રજવાડું; આહાહાહા!
દાતરડું બદલીને પાછો કામે વળવા ડગ માંડું ત્યાં
શરીર ઝંખે ખાવા થોડો થાક અને બસ એવે ટાણે
સૂરજ પહેલાં ઝાકળ જોયું હોય એ શેઢે એક
રોટલા ભેગી બે ડુંગળિયું આવે એ રજવાડું; આહાહાહા!
~ મધુસૂદન પટેલ
બાળપણની યાદના કોઈ મૂલ ન થાય ! આહાહાહા….
વરસાદમાં નહાવા દોડી જવું એ વાત આજેય રોમાંચક લાગે. – આજના શહેરી બાળકના નસીબમાં કદાચ એટલું નથી લખ્યું, મમ્મીને ‘ગંદુ’ થઈ જવાની બીક છે !
સાંજ પડે ને તોય રમવાનું પૂરું ન થાય અને ઘરેથી બધાં શોધવા નીકળે ! – હવે શેરી કે પાદર તો શું, સ્કૂલમાંય બાળકોને ક્લાસમાં જ લંચબોક્સ ખોલીને રિસેસ પૂરી કરવી પડે છે !
અને તારાની છાબડિયું જોવાનું હવે આપણાં નસીબમાંય ક્યાં રહ્યું ? પ્રદૂષણે આભ ઢાંકી દીધું છે. ! ક્યારેક શહેરથી દૂર એકાંત સ્થળે કે જંગલમાં તારાઓ જોવા મળે તો ન્યાલ થઈ જવાય છે !
બસ કવિતા ફરી એ પ્રદેશમાં લઈ જાય છે જ્યાં હવે કલ્પના જ જઇ શકે છે.
OP 21.5.22
***
રન્નાદે શાહ
05-06-2022
વાહ મધુભાઇ..સરસ ગીત…અભિનંદન
મધુસૂદન પટેલ
02-06-2022
ખૂબ ખૂબ આભાર લતાબહેન, મિત્રો અને વડીલો. હરિ ૐ🙏🙏🙏
કિશોર બારોટ
23-05-2022
મધુભાઈનું મધમીઠુ ગીત મોં મીઠાશથી ભરી ગયું
રેખાબેન ભટ્ટ
23-05-2022
બાળમસ્તીનું સુંદર ગીત…..
અંકિત
22-05-2022
વાહ
વિવેક મનહર ટેલર
21-05-2022
સરસ રચના
સાજ મેવાડા
21-05-2022
આવી બાળપણાની યાદ કોઈને કદીના વીસરે રે.
ingit modi
21-05-2022
Rajwadu ma to Maja Maja padi gai – wah madhubhai wah
છબીલભાઈ ત્રિવેદી
21-05-2022
મધુસુદન પટેલ નુ કાવ્ય વાંચી ગામડાનુ બચપણ યાદ આવી ગયું ખુબ સરસ રચના આભાર
પ્રતિભાવો