શ્યામ સાધુ ~ અવળ સવળ * Shyam Sadhu
અવળ સવળ ઇચ્છાનો ~ શ્યામ સાધુ
અવળ સવળ ઇચ્છાનો મલમલ તાર બની જા
ઘટી શકે એ ઘટનાનો શણગાર બની જા !
એકલદોકલ હોવાનો અસબાબ કાયમી,
આંખો મીંચી અંદરનો આધાર બની જા !
મેંય કિરમજી રસ્તાનો ઇતિહાસ લખેલો,
શક્ય હોય તો તું ય ક્ષણોનો સાર બની જા !
ખરી ગયેલા તારા જેવું ભાગ્ય મળે તો,
રાત પૂનમની હોય ભલે અંધાર બની જા !
આખેઆખી શેરી એને યાદ કરે છે,
સમજ પડે તો ત્યાં જઈને અભિસાર બની જા !
હું મરજીવો, તું મરજીવો મોતી માટે,
છોડ સકલ બકવાસ, યાર તું યાર બની જા !
~ શ્યામ સાધુ
અનુભુતિના ઊંડાણમાંથી પ્રગટેલી ગહન આધ્યાત્મિકતા !
આ શેરમાં પણ પરમનું જ અનુસંધાન છે પણ હળવા શબ્દો ભાવકને છેતરીય શકે ! – ‘છોડ સકલ બકવાસ, યાર તું યાર બની જા !
મને સૌથી વધુ સ્પર્શી ગયો એ બીજો શેર.
OP 15.6.22
***
છબીલભાઈ ત્રિવેદી
15-06-2022
અમારા જુનાગઢ ના કવિ શ્રી શ્યામ સાધુ ની સરસ રચના પ્રણામ આભાર લતાબેન
Varij Luhar
15-06-2022
ખૂબ સરસ ગઝલ… કવિશ્રી શ્યામ સાધુની શબ્દ ચેતનાને વંદન 🙏💐
ખૂબ સરસ ગઝલ.