પ્રબોધ ભટ્ટ ~ જૂના રે વડલા * Prabodh Bhatt
ફરી વતનમાં
જૂના રે વડલા ને જૂના ગોંદરા, જૂની સરોવર-પાળ;
જૂનાં રે મંદિરે જૂની ઝાલરો બાજે સાંજસવાર;
એથીયે જૂની મારી પ્રીતડી.
ઘેરાં રે નમેલાં ઘરનાં ખોરડાં, ઘેરા મોભ ઢળન્ત;
ઘેરી રે ડુંગરાળી મારી ભોમકા, ઘેરા દૂરના દિગન્ત;
એથીયે ઘેરી મારી વેદના.
ઘેલી રે ઘૂમે ગોરી ગાવડી, ઘેલાં પંખી પવન;
ઘેલી રે ગોવાળણ ગોપની, સુણી બંસી સુમંદ,
એથીયે ઘેલી મારી ઝંખના.
મનની માનેલી ખેલે મસ્તીઓ, આંગણ બાળક-વૃન્દ;
ફૂલડાં ખીલે ને ખેલે તોરમાં, માથે મસ્ત પતંગ,
એથીયે મસ્તાની મારી કલ્પના.
સૂના રે ઊભા આજે ઓરડા, સૂના મોભ ઢળન્ત;
સૂની રે સંધ્યાને ઓળે ઓસરી, સૂની ખાટ ઝૂલન્ત,
એથીયે સૂની રે ઝૂરે જિંદગી.
~ પ્રબોધ ભટ્ટ (20.12.1913 – 14.2.1973)
કવિના જન્મદિને સ્મૃતિવંદના
જન્મ કોટડાસાંગાણી, જિલ્લો રાજકોટ વતન ભાવનગર. સાદરામાં અવસાન.
કાવ્યસંગ્રહો : ‘અંતરિક્ષ’ અને ‘સરોરુહ’
વતન ની યાદ અપાવી દિધી સ્મ્રુતિવંદન
વતનવિછોહની તીવ્ર અનુભૂતિની સારી રચના.
સાદર સ્મરણ વંદના.
કવિ ને સ્મૃતિ વંદના