કવિતા કાદંબરી ~ મારા દીકરા : અનુ. ભગવાન થાવરાણી * Kavita Kadambari * Bhagvan Thavrani

મારા દીકરા   

મારા દીકરા
ક્યારેય એટલો ઊંચો ન થઈશ
કે તારા ખભે માથું ટેકવી કોઈને રડવું હોય
તો સીડી મૂકવી પડે

એટલો બુદ્ધિજીવી પણ નહીં
કે મજદૂરોના વાનથી અલગ લાગે તારો વાન

એટલો ઈજ્જતદાર ન બનીશ
કે મોંભેર પછડાટ ખા
ત્યારે ઊભા થવામાં શરમ આવે

એટલો વિવેકી પણ નહીં
કે મોટાઓની આજ્ઞાનું ઉલ્લંઘન ન કરી શકે

એટલો સભ્ય ન થઈશ
કે અગાસીએ પ્રેમરત કબૂતર-યુગલ
તને અશ્લીલ લાગે
અને કાંકરો ફેંકી બાળકો સામેથી એમને ઉડાડી મૂકે

એટલો સ્વચ્છ ન બનીશ
કે જાત-મહેનતથી મેલા થયેલા કૉલરનો મેલ
લોકોથી સંતાડવો પડે

એટલો ધાર્મિક ન બનીશ
કે ઈશ્વરને બચાવવા
માણસ પર હાથ ઉગામી બેસે

ન તો ક્યારેય એવો દેશભક્ત
કે કોઈ ઘાયલને ઊભો કરવા
ધ્વજ જમીન પર ન મૂકી શકે

એટલો જડ ન થઈશ
કે કોઈ લથડે તો અનાયાસ હસવું આવી જાય

અને ન ક્યારેય એવો સ્વ-કેન્દ્રિત
કે કોઈનું પ્રેમમાં તડપવું કે ભૂખે મરવું
વાર્તા જેવું લાગે..

~ કવિતા કાદંબરી * હિન્દી પરથી અનુવાદ : ભગવાન થાવરાણી

કેટલું હૃદયસ્પર્શી કાવ્ય ને એનો એટલો જ ઉત્તમ અનુવાદ ! એક બાળકને સારો માનવી બનાવવા આનાથી વિશેષ શું જોઈએ?