રમેશ પારેખ ~ આ થાશે

આ થાશે, તે થાશે, શું થાશે ?

આ થાશે, તે થાશે, શું થાશે ?
થવાનું હશે એ તો થાશે ને પછી એનો
ભૂખરો લિસોટો રહી જાશે.

આપણે જ અંધારું બોગદું ને એમાંથી
આપણે જ સોંસરવું જાવું;
ગયા વિના અન્ય કોઈ છૂટકારો નહીં,
પાછું મન વિશે થાય : સાલું આવું ?
અવળસવળ આમતેમ વાતો સન્નાટો પછી
આપણી સોંસરવાયે વાશે.

આપણા ખભા પરથી શ્વાસોનો બોજ કોઈ
લઈ લેશે પોતાની કાંધે
એ જ ક્ષણે કોઈ ચીજ, કોઈ વાત, કોઈનો સંબંધ
નહીં આપણને બાંધે
જેટલું હયાતી વિશે સોચશોને તમે,
મોત એટલું જ તમને સમજાશે.

~ રમેશ પારેખ

રમેશોત્સવ