મારો આતમરામ
હજીયે ન જાગે મારો આતમરામ !
મારો આતમરામ !
સમુંદર ઘૂઘવે છે દૂર, વાયુ સૂસવે ગાંડોતૂર,
સમજું ન ભરતી કે આ તે આવે છે તુફાન !
આ તે આવે છે તુફાન !
હજીયે ન જાગે મારો આતમરામ !
સઢ સંધા ફડફડે, દોર ધીંગા કડકડે,
હાજર સૌ ટંડેલ એક આ સૂનાં છે સુકાન !
મારાં સૂનાં છે સુકાન !
હજીયે ન જાગે મારો આતમરામ !
વહાણ રાખું નાંગરેલું, વેપાર શી રીતે ખેડું ?
સવાયા થાશે કે જાશે મૂળગાય દામ !
મારા મૂળગાય દામ !
હજીયે ન જાગે મારો આતમરામ !
હવે તો થાય છે મોડું, વીનવું હું પાયે પડું,
મારે તો થાવા બેઠો છે ફેરો આ નકામ !
મારો ફેરો આ નકામ !
જાગો જી જાગો મારા આતમરામ !
વ્હાલા આતમરામ!
~ રામનારાયણ પાઠક ‘શેષ’
આ સરસ મજાનું ભજનગીત સાંભળો અમર ભટ્ટના સ્વરમાં
કવિને વંદન. સરસ રચનાઓ પસંદ કરી છે. ધન્યવાદ.
પહેલું ગીત ભજન પણ બીજુ ગીત વાંચનારની ભાવસ્થિતી પર આધાર રાખતું હશે. મને એમ જ થયું, તમારી નોંધથી ચમકી જવાયું. ખરી કમાલ કવિ શ્રી ‘શેષ’ની.
સાચું.