યોગેશ જોષી ~ કે કિનારે કોણ બેસે * Yogesh Joshi
કે કિનારે કોણ બેસે, ડૂબકી મારી હતી
પાણીને સ્પર્શ્યા વિના મેં માછલી પકડી હતી
આંખ મીંચું ને કમળની જેમ નભ આ ઊઘડે
એક ઝીણી તારલી બસ નાભિમાં ઝબકી હતી
તાળવામાં ઝળહળે છે સૂર્ય શીતળ કેટલા
જીભ મારી કૈં યુગોથી તેજની તરસી હતી
આભ આખું આમ ઉકેલી દીધું અંધારનું
વીજના ઝબકારની એ તેજક્ષણ અટકી હતી
અગ્નિ સાતે એકદમ ભપકી ઊઠ્યા’તા છાતીમાં
જળ તણી આ જાળમાં મેં કૈં લહર પકડી હતી
કોક પંખી થઈ અચાનક હું ઊડ્યો ઊંચે કશે
રોમરોમે એકસાથે પાંખ કૈં ફફડી હતી
~ યોગેશ જોષી
યોગેશ જોષી આમ અછાંદસના માહેર કવિ છે પરંતુ આ ગઝલનાયે અમુક શેર કમાલના લાગે છે ને !
સરસ મજાની રચના ખુબ ગમી અભિનંદન
ગઝલમાં અછાંદસની અસર દેખાઈ મનેતો.