આપણી વચ્ચે કાંઈ નથી ને આમ જુઓ તો જોજન છે
તું કોઈ ખુલાસો આપ નહીં તને મૌનના સોગંદ છે.
સમજું છું એથી તો જોને ચૂપ રહેવાની વાત કરું છું
ધુમ્મસ જેવા દિવસોની હું ઘોર અંધારી રાત કરું છું
વાસંતી આ હવા છતાંયે સાવ ઉદાસી મોસમ છે.
આપણી વચ્ચે કાંઈ નથી ને આમ જુઓ તો જોજન છે.
હવે વિસામો લેવાનો પણ થાક ચડ્યો છે
આપણો આ સંબંધ આપણને ખૂબ નડ્યો છે
આમ જુઓ તો ખુલ્લેઆમ છે ને આ જુઓ તો મોઘમ છે
તું કોઈ ખુલાસો આપ નહીં તને મૌનના સોગંદ છે.
~ સુરેશ દલાલ
કવિ સુ. દ. એ ગીતો સરસ રચ્યાં છે, આ ગીત ગમ્યું. ગઝલ ખાસ લખી નથી.