ડૉ. મુકેશ જોશી ~ હું કહી શકું

આ ક્ષિતિજ થોડીક આવે પાસ, તો હું કહી શકું;
કાં પછી જો થાય એવો ભાસ, તો હું કહી શકું…..

કેટલાં જન્મો તણી છે વાત બાકી રહી હજી!
એટલા ચાલે અગર આ શ્વાસ, તો હું કહી શકું……

વાત છે, શબ્દોય છે, કહેવુંય છે ને છે સમય;
કોઈ જો એવું મળેને ખાસ, તો હું કહી શકું…..

સાંજ પડતી હોય છે સંબંધમાં ક્યારેક તો;
સ્હેજ પાછો થાય જો અજવાસ, તો હું કહી શકું…..

તું મને પૂછ્યા કરે છે રોજ સરનામાં વિશે;
ઈશનો જો એક હો આવાસ, તો હું કહી શકું……

આમ તો થોડા હજીયે શે’ર તો કહેવા જ છે;
કાફિયાના જો મળે ને પ્રાસ, તો હું કહી શકું…..

~ ડૉ. મુકેશ જોષી

‘વાત છે, શબ્દોય છે…….’ આવો અનુભવ સંવેદનશીલ માનવીને થતો જ રહેતો હોય….. પણ ‘એવું કોઈ’ મળે… એ તો નસીબ!

અને આ શેર ખૂબ ગમ્યો. ‘સાંજ પડતી હોય છે સંબંધમાં’ એકધારો પ્રકાશ્યા રાખે એવો કોઈ સંબંધ હોય ખરો? ‘ના’. દરેક સંબંધમાં ઉતાર-ચડાવ આવતા જ રહેતા હોય છે. એ ગમે એટલો ઘનિષ્ઠ કેમ ન હોય! અને ત્યારે એક પક્ષે તો ઘણું કહેવાનું હોય જ છે….. અને અજવાસના એકાદ કિરણની રાહ જોયા વગર શબ્દો હોઠે નથી આવી શકતા…..