ચંદ્રકાંત શેઠ ~ છત મળશે * સ્વર ઓસમાણ મીર

સોડ માતની ક્યાં?

છત મળશે ને છત્તર મળશે, ગોદ માતની ક્યાં?
શયનખંડ ને શય્યા મળશે, સોડ માતની ક્યાં?

રસ્તા મળશે, રાહી મળશે, રાહત માની ક્યાં ?
ચાંદ સૂરજ ને  તારા મળશે, આંખો માની ક્યાં ?

પલ્લવ ને પુષ્પો પણ મળશે, પાલવ માનો ક્યાં?
સૂર, તાલ ને સંગીત મળશે, ટહુકો માનો ક્યાં ?

હાજર હાથ હજાર હોય પણ છાતી માની ક્યાં?
બારે ઉમટે મેહ, હેતની હેલી માની ક્યાં?

ભર્યા ઉનાળે પરબ સરીખી છાયા માની ક્યાં?
ભર્યા શિયાળે હૂંફ આપતી માયા માની ક્યાં ?

~ ચંદ્રકાંત શેઠ

કાવ્ય : ચંદ્રકાન્ત શેઠ  સ્વરકાર: અમર ભટ્ટ  સ્વર: ઓસમાણ મીર

આલબમ: હરિને સંગે

(નીચે ઓડિયો સાંભળી શકો છો.)