રમેશ પારેખ ~ એક છોકરાએ & આજ મને * Ramesh Parekh
લે ઝૂલ
એક છોકરાએ સીટ્ટીનો હિંચકો બનાવી
એક છોકરીને કીધું : ‘લે ઝૂલ’
છોકરાએ સપનાનું ખિસ્સું ફંફોસીને
સોનેરી ચોકલેટ કાઢી રે
છોકરીની આંખમાંથી સસલીનાં ટોળાએ
ફેંકી કૈં ચિઠીઓ અષાઢી રે
સીધી લીટીનો સાવ છોકરો ને
પલળ્યો તો બની ગયો બેત્રણ વર્તુલ….
છોકરીને શું ? એ તો ઝૂલી,
તે પછી એને ઘેર જતાં થયું સ્હેજ મોડું રે
જે કાંઇ થયું એ તો છોકરાને થયું
એના સાનભાન ચરી ગયું ઘોડું રે
બાપાની પેઢીએ બેસી તે ચોપડામાં
રોજરોજ ચીતરતો ફૂલ.
~ રમેશ પારેખ
રમેશોત્સવ
સખી હે
આજ મને મોરપીંછનાં શુકન થયાં સખી હે
હે ચપટી નીંદર વીણવા અમે ટેવનાં માર્યાં
બોરડી કને ગયાં
સખી આજ મને મોરપીંછનાં શુકન થયાં સખી
આજ રાબેતાભેર હું મારે ઘેર ન પાછી આવી
કોઈ મને ઘેર લાવ્યું કે હું ઘેર કોઈને લાવી?
પાસ પાસે અણસાર જેવું પણ નીરખ્યું
તો મોંસૂઝણાં છેટાં રહ્યાં
સખી આજ મને મોરપીંછનાં શુકન થયાં સખી
મોર વિનાનું પીંછ દીઠું કે પીંછ વિનાનો મોર!
કોણ જાણે પણ કીકીઓ કરે ઢેલ સમો કલશોર
મોરને એનું કોઈ ચોમાસું સાંભરી આવે
એટલાં લોચન વહ્યાં સખી
આજ મને મોરપીંછનાં શુકન થયાં સખી
આજ મને મોરપીંછનાં શુકન થયાં સખી હે
હે ચપટી નીંદર વીણવા અમે ટેવનાં માર્યાં
બોરડી કને ગયાં સખી
આજ મને મોરપીંછનાં શુકન થયાં સખી…
~ રમેશ પારેખ
રમેશોત્સવ
ગીત કવિ ર.પા. ની કાવ્ય રચનાઓ નોંખી હોય છે.
ર.પા. એ ર.પા. !