અમર પાલનપુરી ~ આંખોમાં છલકતો & ઈર્ષ્યા જ્યારે * Amar Palanpuri * સ્વર : Prahar Vora
કૈફ હશે
આંખોમાં છલકતો કૈફ હશે
હાથોમાં ભરેલા જામ હશે;
બોલાવ્યા અમે ના બોલીશું,
પણ હોઠે તમારું નામ હશે.
મેં લાખ ગુનાઓ કીધાં છે,
પણ સાવ નિખાલસ હૈયાથી;
હો નર્ક જ મારું ધામ ભલે
પણ સ્વર્ગમાં મારું નામ હશે.
હું તુજને કરી દઉં માફ ભલે
પણ લોક નહીં છોડે તુજને
જે માર્ગમાં માર્યો તેં મુજને
એ માર્ગ પર મારું નામ હશે
હો દિલમાં ભલે સો દર્દ ‘અમર’
હમદર્દી ખપે ના દુનિયાની
મનગમતો દિલાસો મળશે તો
આરામ હશે આરામ હશે.
~ અમર પાલનપુરી
ઈર્ષ્યા જ્યારે આળસ મરડે
ઈર્ષ્યા જ્યારે આળસ મરડે
ખાર તો શું, ખુદ ફૂલો કરડે.
ધોઇ નાખ્યા હાથ સ્વજનથી,
કોણ હવે શત્રુમાં ખરડે ?
ભૂલ્યા કેમ ભુલાશે મિત્રો ?
ઘાવ હજુ તાજા છે બરડે !
ઊંડા ઘા તો કૈંક સહ્યા, પણ –
જાન ગયો છે એક ઉઝરડે.
મેરુનો મહિમા ગાનારા,
અંજાયા છે એક ભમરડે !
કહેશે કોણ ઝવેરી તમને ?
ફેંકી દીધાં રત્ન ઉકરડે !
રાખ્યું નામ अमर એથી શું?
કોને છોડ્યો મોતના ભરડે ?
~ અમર પાલનપુરી
જન્મદિવસની શત શત શુભકામનાઓ કવિ
ગઝલ ‘અમર ‘પાલનપુરી * સ્વર : પ્રહર વોરા * સ્વરાંકન : ગૌરાંગ વ્યાસ
જન્મદિવસની શુભકામનાઓ કવિને, બંને ટૂ્કી બહેરની ગઝલો સરસ.
વાહ. ગઝલ બન્ને, સ્વરાંકન, સ્વરભાવ ્્્
અભિનંદન ્
વાહ વાહ ખુબ સરસ જન્મદિવસ ની શુભ કામના
સાવ સરળ શબ્દોમાં વહેતી બંને ગઝલ ..
અભિનંદન.