એષા દાદાવાળા ~ ફૂટપાથની ધારે
ફૂટપાથની ધારે
રાતે સાવ ભૂખ્યા સૂઈ ગયેલા બાળકની આંખોમાં
કેવાં સપનાં આવતાં હશે, ખબર છે ?
એના સપનામાં પરીઓ આવી
બરાબર સિન્ડ્રેલાની વાર્તાની જેમ જએમને
નવાં નક્કોર કપડાં પહેરાવી
પિઝા-બર્ગર-પેસ્ટ્રી એવું ખવડાવી જતી હશે ?
કે પછી સવારે જ એની ઉંમરના બાળકને
એની મમ્મી સાથે હસતું-રમતું જતાં જોઈને
એના મનમાં જે કલ્પના ચાલેલી એવું જ કંઈક
સપનામાં આવીને સાન્તાક્લોઝ સાચું કરી જાય ?
પણ હમણાં તો એને સપનામાં દેખાય છે
કપરકાબી ધોતાં-ધોતાં તૂટી ગયેલાં
બે નંગ કપ-રકાબીના પૈસા
મહિનાના જરા-અમથા પગારમાંથી કપાઈ જવાના છે તે
ચોકલેટ લેવા માટે બચાવી રાખેલા પૈસાનો બાપ દારૂ પી ગયો છે તે
આ બધાં જ સપનાઓ
હમણાં હમણાં તો એને ઊંઘમાંથી ઝબકાવી જગાડી દે છે
પણ ચિંતા ન કરો
થોડા દિવસ પછી એ ઝબકીને નહીં જાગે
કારણ કે એને સપનાઓ જ નહીં આવે…
~ એષા દાદાવાળા
બાળમજૂરનો તાદૃશ ચિતાર આપતું કાવ્ય ! આવા શબ્દો વાંચીને હલબલાવી નાખે છે. આવો, એને બરાબર યાદ રાખીને પેલા લારી પર કામ કરતા બાળકની જિંદગીને બહેતર બનાવવા પ્રયાસ કરીએ.
સાભાર – કાવ્યસંગ્રહો : ‘વરતારો’ 2008
30.4.21
Anila shah
19-05-2021
Very touchy
ડો. પુરુષોત્તમ મેવાડા, સાજ
30-04-2021
એક વાસ્તવિક પ્રસંગ ચિત્ર ને અછાંદસ કવિતા માં ફેરવવની હથોડી/ટી કવિયત્રી એષા જીમાં દેખાય છે, થોડા શબ્દોમાં સરસ રીતે વેદના રજૂ કરીને કરામત કરી છે.
પ્રતિભાવો