સંજુ વાળા ~ પધરામણાં લગ * Sanju Vala
પધરામણાં લગ ~ સંજુ વાળા
ઓરડેથી ઓસરી ને ઓસરીથી આંગણા લગ
વાત ડમરાઈને અટકી બેઉનાં હોવાપણાં લગ
ચોક-શેરીનું કુતૂહલ આવી ઊભું બારણા લગ
પ્લીઝ માની જા, નહીં તો પ્હોંચી જાશે આપણાં લગ
કાલે અનરાધાર ત્રાટકવાની છે સંભાવના
જાણતલનું કહેવું છે : આવી ગયો મે ઠામણાં લગ
તું કહે છે : ‘રામરટણા’નાં અનુષ્ઠાનોમાં રત છે
હું કહું છું : કસરતો સૌ પહોંચવા રળિયામણા લગ
હું તને સુંદર, અનુપમ લેખું એ જો ઓછું છે તો-
તારી મેળે પહોંચી જા તું ‘કોડિલા – કોડામણા’ લગ
પહેલાં ફરકી આંખ, મલક્યા હોઠ, માન્યું મન, પછીથી
કોળી ઊઠી કામના ને વિસ્તરી ઓવારણાં લગ
આવતાં-જાતાં સ્મરણ પર જો તને શ્રદ્ધા નથી તો-
હે હ્રદય ! તું વાટ જોજે કાયમી પધરામણાં લગ.
~ સંજુ વાળા
પુરુષ અને સ્ત્રીમાં રિસામણાં તો થાય, એ સહવાસની સાબિતી કહી શકાય. અહીં એની કાવ્યાત્મક અભિવ્યક્તિ કાબિલેદાદ છે ! ક્યાંક ચેલેન્જ અપાઈ છે તો છેલ્લે ધમકી ! અને તેય પોતાના હૃદયને જ ! આમ જુઓ તો કવિએ વાસ્તવિકતા જ ચીતરી છે પણ વાસ્તવને આટલી સુંદર રીતે આલેખી શકાય ! સલામ તો બનતી હૈ !
OP 11.7.22
***
સાજ મેવાડા
11-07-2022
વાહ પતિ-પત્ની ના સાયુજ્ય સાથે રીસામણા મનામણાનો રંગ ભળે તો આખરે મજા તો આવે.
Dipak Valera
11-07-2022
વાહ ખૂબ સુંદર
છબીલભાઈ ત્રિવેદી
11-07-2022
કાબીલેદાદ,,,, ખુબજ સુન્દર રચના સલામ આભાર લતાબેન
Kirti Shah
11-07-2022
Latabwn tamej sunder aalekhan karyu Vadhu umerva nu maru gaju nathi. Vat che Sanjuvada no Kavita ni
પ્રતિભાવો