ચિનુ મોદી ~ આ સ્મરણ પણ & આવ અથવા મને * Chinu Modi
ન્હૈં ?
આ સ્મરણ પણ અજાયબ ચીજ ન્હૈં ?
ત્રાટકી પડનાર કોઈ વીજ, ન્હૈં ?
આટલો મબલખ અહીં અંધાર છે
ભૂલથી વાવ્યું હશે મેં બીજ, ન્હૈં ?
જળકમળવત્ લેખતો હું જાતને –
પાણીમાં પધરાવી દઉં આખી જ, ન્હૈં ?
કેમ દેખાયો નહીં હોવા છતાં ?
આડી આવી જાત પોતાની જ, ન્હૈં ?
જ્યાં બિરાજે એ જ ડાળી કાપતો
આપનો ‘ઈર્શાદ’ આ નાચીઝ, ન્હૈં ?
~ ચિનુ મોદી
પૂણ્યતિથિએ કવિને સ્મરણવંદના
તું
આવ અથવા મને બોલાવ તું
શ્વાસને અટકાવ કે દોડાવ તું
ક્યાં સુધી ઉંબર ઉપર ઊભો રહું ?
કાઢ પાછો કાઢ કે પોંખાવ તું
મૂળથી તે ટોચ લગ આખાય તે
આ સડેલા વૃક્ષને ટચકાવ તું
કેમ દરિયાને ખસેડ્યે જાય છે ?
આ નદીને આમ ના મૂંઝાવ તું
આપના ઇર્શાદની એક જ અરજ
આ હવાની ભીંતને કોચાવ તું…
~ ચિનુ મોદી
કવિ ચિનુ મોદીના પરિચય માટે વાંચો
પ્રતિભાવો