આશા ગોસ્વામી ~ ઈશ્વર, તમે કહો તો * Aasha Goswami
તમે કહો તો
ઈશ્વર,
તમે કહો તો
મીણબત્તીથી
સૂરજને સળગાવી મૂકું.
સોયદોરો લઈને આભને
થીંગડા મારી આવું.
તમે કહો તો
સમયની બધી જ મર્યાદાઓ તોડીને ગાંડીતૂર
સરિતાની જેમ બેય કાંઠે છલકાઉં –
ને સાગર ઉલેચીને ખીણો સર્જું.
તમે કહો તો
પર્વતો તોડીને
ખીણો બનાવું ને ખીણોમાં
મારા આંસુના સાગર છલકાવું.
ઈશ્વર,
પછી તો તમે મને પ્રેમ કરશોને ?
તમે બોલોને ?
પછી તો તમે મને પ્રેમ કરશો જ ને ?
~ આશા ગોસ્વામી
પ્રેમ પામવાની અતિ ઉત્કટ અભિવ્યક્તિ… સ્ત્રી પુરુષ પાસેથી પ્રેમ પામવા માટે બધું સમર્પી દે છે અને પુરુષ મોટે ભાગે એનો જુદો અર્થ કાઢે છે ! એ સ્ત્રીના જીવનની સૌથી મોટી પીડા!
@@
જ્યાં ન પહોંચે રવિ ત્યાં પહોંચે કવિ.
વાહ ખુબ સરસ અભિવ્યક્તિ
ખૂબ સરસ કવિતા – આશા ગોસ્વામીને અભિનંદન – –
વાહ કવિ..