લતા હિરાણી ~ ઊગ્યું રે * Lata Hirani
ગીત
ઊગ્યું રે અજવાળું, પેલી ટગલી ડાળે જો
દડિયું ઝાકળ ઝાળું, પેલી ટગલી ડાળે જો…
પરોઢિયાની પાંખે ફૂટે, ટશિયા કેવા રાતા
સંતાકૂકડી રમતા પેલા અંધારા સંતાતા
ચાંદો ચપટીમાં સંકેલી, ભૂરકી ખાળે હો
ટગલી ડાળે જો…
હળવે લહેરાતી કલરવની, કૂંજગલીઓ પ્યારી
ઉગમણા પડખાને ઝાલી, પ્રગટી સૂર્યસવારી
શરમાતી સુગંધો પહોંચી, ફૂલની પાળે લો
ટગલી ડાળે જો…
તેજ સમા તગતગ અજવાસો, ધરતી પર પથરાય
ઝાકળથી રમતા કિરણોની આમ પથારી થાય
પનિહારીના લોચન રમતાં, કૂવા થાળે કો’
ટગલી ડાળે જો…
~ લતા હિરાણી
પ્રકાશિત > ‘શબ્દસર’ > 10-2023
નિસર્ગની તાજગી અને પ્રસન્નતા લઇ આવેલું સહજ સુંદર ગીત
વાહ, સુંદર સવારનું પ્રકૃતિગીત,
સરસ રચનાઓ, ઘનૃયવાદ
તમારું ગીત બહુ સરસ છે.નાજુક અને નમણી અભિવ્યક્તિ !
હાર્દિક અભિનંદન !