જગદીશ ધનેશ્વર ભટ્ટ ~ પાદરની કેડી * Jagdish Dhaneshwar Bhatt
સાવ સૂની પાદરની કેડી
કોઈ મળે ના સંગી-સાથી, કોઈ લિયે ના તેડી
સાવ સૂની પાદરની કેડી.
આગળ વધવું એ જ આરદા કોઈ શકે ના રોકી,
અટવાતાં અંધારાં ભેદી નજર રહી અવલોકી,
વીજ તણા ચમકારે હળવે ભવની ભાવટ ફેડી,
સાવ સૂની પાદરની કેડી.
આંખ ઊઘડતાં જોયા આગળ અજવાળાંના ડેરા,
સાસ-ઉસાંસે ખરતા દીઠા જનમ જનમના ફેરા,
રોમ રોમ જાગે અરમાને, પગની તૂટી બેડી,
સાવ સૂની પાદરની કેડી
કોઈ મળે ના સંગી-સાથી, કોઈ લિયે ના તેડી
સાવ સૂની પાદરની કેડી.
~ જગદીશ ધનેશ્વર ભટ્ટ
પાદરની કેડી સૂની છે પણ પથિક તો ચાલતો જ રહે.
વાહ ખુબ સરસ રચના બધા શેર ખુબ ગમ્યા અભિનંદન
ખૂબ સરસ, એકલતાની, વેદનાની, અભિવ્યક્તિ.