કિસન સોસા ‘અનામય’ ~ આ જીવતું શહેર
આ ‘જીવતું શહેર’ જિવાડી શકે નહીં
જિજીવિષાને ઘૂંટ પીવાડી શકે નહીં.
ખામોશી ઓઢી સૂતું ઠંડુંગાર ‘માર્ગ’માં
એને કશો જ દાહ દઝાડી શકે નહીં.
જાહેરમાં સરાહતું, ખૂણે વખોડતું
ચહેરેથી મુખવટા એ ઉખેડી શકે નહીં.
છે છીછરી તરસ, ક્ષુધા… સ્વપ્નો… છે સાંકડા
ખુદને સમષ્ટિમાં એ જગાડી શકે નહીં.
વાળી લે લાગણીની નદી દૂર દૂરથી
મિલાવો હાથ, હૈયે લગાડી શકે નહીં.
માણસનું ખોળિયું ઠઠાડી નીકળે ભલે,
માણસપણાનો શબ્દ ઉપાડી શકે નહીં.
~ કિસન સોસા ‘અનામય’ (4.4.1939)
વેધક ગઝલ. સુરતના આ કવિની પોતાના શહેર માટે લખાયેલી ગઝલ બધાં જ શહેરોને લાગુ પડે !
કવિના જન્મદિને સ્મૃતિવંદના
પ્રતિભાવો