કાલિંદી પરીખ ~ ઘાટા મુલાયમ વાળ
ઘાટા મુલાયમ વાળ
હવે પાતળા થવા લાગ્યા છે.
સ્નેહ-સંબંધોનું પોત
હવે કંઈક ઝાંખું થતું જાય છે.
એક વખતના માનેલા સ્વજનો
અને વતન પણ –
બદલાયેલા લાગે છે.
…
જેમ જેમ સફેદ વાળ વધતાં જાય છે
તેમ તેમ હું મુજથી નજીક થતી જાઉં છું.
ગૂંચળું વળેલા વાળાને સરખા કરું છું
સૂતેલી પળોને જગાડું છું.
સફેદ કેશને કરું શ્યામ ?
ના, એ તો ધજા
જ્યાં મારો અંતિમ મુકામ.
– કાલિંદી પરીખ
1.12.20
જગત સામે જાતનું પોત બદલાતું રહે છે, જીવને આ બદલાવનો અનુભવ અમુક સમયે થયા કરે. આ સૌના અનુભવની વાત છે. અલબત્ત એનો સ્વીકાર સામાન્ય રીતે અઘરો હોય છે ! અહીંયા કવયિત્રીએ એ સ્વીકાર અને એનો જાહેર એકરાર પણ કર્યો છે ! જીવનની સામાન્ય બાબતોને એક જુદી નજરથી જોવાની કવિને મળતી કુદરતી બક્ષિસ આ શબ્દોમાં તરવરે છે. વાળની સફેદી, જીવનનો અનુભવ જાગૃત માનવીને ‘સ્વ’ને પામવામાં સહાયક બને છે. આ ‘સ્વ’ની જાહોજલાલી તો જેમણે અનુભવી હોય એ જ જાણે ! કવિ જયંત પાઠકના શબ્દોમાં ‘અનુભવ ગહરા ગહરા’ આ અનુભવની ધજા અંતિમ મુકામ સુધી ફરકતી રહે એ ભાગ્યશાળી !
સાભાર : ‘ક્યાંક વચ્ચે દિવાલ’ કાવ્યસંગ્રહ
પ્રતિભાવો