શૈલેષ પંડ્યા ‘ભીનાશ’ ~ આંખ એકાએક
આંખ એકાએક ઓચિંતી ભરો એવું બને?
સહેજ ચાલીને તમે પાછા ફરો એવું બને ?
આવવાની ઝંખના હોવા છતાં આવ્યા નથી ,
ક્યાંક પાછા એ જ ઈચ્છાને વરો એવું બને ?
ક્યાં કદીયે એક સાદે કોઈ પ્રશ્નો સાંભળ્યા ?
જીવતા જીવે અહમથી પણ ડરો એવું બને ?
હું સમી સાંજે સમયને શોધવા પાછો ગયો,
જિંદગીને આપ પણ શોધ્યા કરો એવું બને?
આમ તો “ભીનાશ” જેવું ક્યાં હતું વાતાવરણ
તોય ફોટા આંસુના સામે ધરો એવું બને?
– શૈલેષ પંડ્યા ‘ભીનાશ’
‘ભીનાશ’ ઉપનામ રાખવું જેને ગમે એનું હૈયું ભેજભર્યું હોય ! આ રચના એવી જ ભેજભરી છે. કવિતાની શરૂઆત જ આંસુથી થાય છે. કોઈ જતાં જતાં એકવાર ફરી પાછું વળીને જુએ તો ! એનો અર્થ-સંદર્ભ આપણે બધાં જાણીએ છીએ. ‘એવું બને ?’ રદ્દીફ તલાશને જીવતી રાખે છે, હૈયાને લીલુંછમ્મ રાખે છે. કોઇની ઝંખના છે અને ‘આમ થશે ?’ ‘આમ થાય તો !’ આ કલ્પનાઓના આટાપાટામાં સમયને સતત સાંધ્યા કરવાની મથામણ સરસ રીતે વ્યક્ત થઈ છે. GTPL પર ઝળકતા અને ગીત-ગઝલ લખતા કવિએ એક કાવ્યસંગ્રહ પણ આપ્યો છે, -‘નિખાલસ’
13.1.21
***
Purushottam Mevada, Saaj
13-04-2021
કવિ શ્રી ભીનાશ ની ગઝલ સુંદર છે, ગમી.
પ્રતિભાવો