ધાર્મિક કોટક ‘ગોપાલ’ ~ બે ડગલાં * Dharmik Kotak Gopal

બે ડગલાં હું ચાલ્યો છું

બે ડગલાં હું ચાલ્યો છું ને બે ડગલાં તું ચાલી છે,
શું કરવું છે?? બોલ, હજી તો આખો રસ્તો ખાલી છે.

હાલ મને કંઈ ખ્યાલ નથી એ બંધ તમારી બારીનો,
પણ મારી બારીને કાયમ ખોટ તમારી સાલી છે.

અલબેલી કો’ એક નદીએ આભ વરસતું જોઈને-
બીજીને કીધું “જો એને ધરતી કેવી વ્હાલી છે??”

થોડો થોડો પ્યાર તમે જે કાયમ કાયમ આપો છો,
લાગે છે આ આંસુ એની વહેવારીક દલાલી છે.

દાદ જગતની ઠુકરાવીને આ મહેફિલમાં આવ્યો છું,
કારણ કે ગોપાલ અહીં તો વાતે વાતે તાલી છે.

~ ધાર્મિક કોટક ‘ગોપાલ’

નવી તેજસ્વી કલમોમાંનું આ એક નામ.

વાતચીતની શૈલીમાં દમદાર શેર.