રાજેન્દ્ર શાહ ~ આપણાં દુખનું
ભાઈ રે, આપણા દુ:ખનું કેટલું જોર ?
નાની એવી જાતક વાતનો મચવીએ નહિ શોર !
ભારનુ વાહન કોણ બની રહે? નહી અલૂણનું કામ,
આપણ તો બડભાગી, ખમીરનું આજ ગવાય રે ગાન;
સજલ મેઘની શાલપે સોહે રંગધનુષની કોર.
જલભરી દગ સાગર પેખે, હસતી કમળફૂલ,
કોકડું છે પણ રેશમનું, એનું ઝીણું વણાય દુકૂલ;
નિબિડ રાતના કાજળ પાછળ પ્રગટે અરુણ ભોર.
આપણે ના કંઈ રંક, ભર્યોભર્યો માંહ્યલો કોશ અપાર;
આવવા દો જેને આવવું, આપણે મૂલવશું નિરધાર;
આભ ઝરે ભલે આગ, હસી હસી ફૂલ ઝરે ગુલમ્હોર.
~ રાજેન્દ્ર શાહ
કવિ રાજેન્દ્ર શાહના જન્મદિને સ્મૃતિવંદના
કવિ શ્રી ના જન્મદિવસે વંદન સરસ મજાની રચના
દુ:ખનું કેટલું જોર?પ્રશ્ન જ ભાવકને અલગ વિચારબિંદુ પર મૂકી દે છે. સુખદુ:ખેશ્વનુદ્વિગ્ન મના: સુખેષુ વિગતસ્પૃહ:ગીતાવચન યાદ કરાવે તેવી કવિતા
કવિશ્રીને ભાવવંદના..સારી સરળ બાનીમાં ઊંચી વાત કેવી સરસ રીતે કવિ કરી દે છે!!
“આભ ઝરે ભલે આગ, હસી હસી ફૂલ ઝરે ગુલમ્હોર.”
શિરમોર પંક્તિ.