સગપણ સાંભર્યું
એવું રે અજાણ્યું સગપણ સાંભર્યું…
સોણલાંની વાડી ઝાકમઝોળ,
કોણ રે ચૂંટે ને કોણ ચપટી ભરે,
મઘમઘ સુવાસે તરબોળ…
એવું રે અજાણ્યું સગપણ સાંભર્યું!
ક્યાં રે કિનારો ને ક્યાં નાંગર્યા
નજરુંના પડછાયા આમ!
ઊગી ઊગીને અચરજ આથમે
પછી એમ પથરાતું નામ…
એવું રે અજાણ્યું સગપણ સાંભર્યું!
ઝાકળ સરીખું ઝલમલ બારણું,
પગલે પાંપણનું ફૂલ,
એક રે હોંકારે ઉઘડે આગળા,
ઓળઘોળ આયખાનું મૂલ…
એવું રે અજાણ્યું સગપણ સાંભર્યું!
~ માધવ રામાનુજ
જન્મદિવસે કવિને સ્નેહવંદન
બંને રચના કવિની સાથે સાથે આપણને પણ ભાવવિશ્વની સફર કરાવે છે. કવિને જ.દિ. ના અભિનંદન.
કવિ શ્રી માધવ રામાનુજ ને સ્નેહ વંદન. બંને રચનાઓ ખૂબ સરસ.
વારંવાર ગણગણવા જેવા ગીત,
કવિ શ્રી માધવ રામાનુજને વંદન.
અને
જન્મદિવસની શુભકામનાઓ.
કવિની કલમ સતત વહેતી રહે.