ઉમાશંકર જોશી ~ લૂ જરી તું * Umashankar Joshi
લૂ, જરી તું ધીરે ધીરે વા, કે મારો મોગરો વિલાય !
કોકિલા, તું ધીમે ધીમે ગા,કે મારો જિયરો દુભાય !
પાંખો થંભાવી ઊભું સ્થિર આભ પંખી,
સૃષ્ટિ મધ્યાહન કેરા ઘેનમાં છે જંપી.
એકલી અહીં હું રહી પ્રિયતમને ઝંખી……. લૂ,જરી તું…
ધખતો શો ધોમ, ધીકે ધરણીની કાયા:
ઊભી છું ઓઢીને પ્રિયતમની છાયા;
પરિમલ ઊડે, ન ફૂલ હૈયે સમાયાં….. લૂ, જરી તું…
~ ઉમાશંકર જોશી
ઉનાળાની બપોરે પ્રિયતમની રાહ જોતી એની છાયા ઓઢીને બેઠેલી નાયિકાનું આ ગીત છે.
ઉ.જો. શબ્દપ્રયોગમાં ખાસ્સા precise હતા. આમ તો ‘ધીરે ધીરે‘ ને ‘ધીમે ધીમે‘ને અદલાબદલી કરીને વાંચી શકાય ને બંનેના અર્થ એક જ થાય છે; પણ અહીં પ્રથમ પંક્તિમાં ‘ધીરે ધીરે’ શબ્દ વાપર્યો તે ઉનાળાની લૂ વાય તેની ગતિ માટે ને બીજી પંક્તિમાં ‘ધીમે ધીમે’ શબ્દપ્રયોગ કોકિલાના અવાજ-volume – માટે હશે! ~ અમર ભટ્ટ
સૌજન્ય : શ્રી અમર ભટ્ટ આલબમ ~ ગીતગંગોત્રી
OP 9.6.22
કાવ્ય : ઉમાશંકર જોશી સ્વરકાર: અમર ભટ્ટ ગાયક: હિમાલી વ્યાસ નાયક
***
આભાર
11-06-2022
પ્રતિભાવ આપનારા સૌ મિત્રોનો દિલથી આભાર
‘કાવ્યવિશ્વ’ની મુલાકાત લેનારા મિત્રોનો પણ આભાર
સિલાસ પટેલીયા.
10-06-2022
ઉમાશંકરનું
લૂ વિશેનું ગીત ખૂબ ગમ્યું.
આનંદભેર આભાર.
વિવેક મનહર ટેલર
09-06-2022
સુંદર ગીત.
અમરભાઈની કવિના શબ્દચયન બાબતની ટિપ્પણી યથોચિત.
છબીલભાઈ ત્રિવેદી
09-06-2022
આજનુ ઉમાશંકરજોશી નુ કાવ્ય ખુબજ ગમ્યું કાવ્ય મા પ્રગટ થતો ભાવ સુંદર આપનો કાવ્ય વિષે નો ભાવાનુ વાદ પણ અેટલોજ સરસ આભાર લતાબેન
દીપક વાલેરા
09-06-2022
ખૂબ સરસ
પ્રતિભાવો