મીનાક્ષી ચંદારાણા ~ ગુરુજી * Minaxi Chandarana

ગુરુજી,  હું તો ઠાલી ઊભી રહી
ગુરુજી હવે કિરપા કરજો કંઈ

એક દિવસ મેં શમણું દીઠું, શમણામાં અજવાસ
એ દિવસે મેં બારી ખોલી, ઝીલવા સૂરજ ખાસ
આડા આવ્યા અંગારા,  ને કંઈ દેખાયું નહીં
ગુરુજી, હું તો ઠાલી ઊભી રહી

એક દિવસ મેં શમણું દીઠું,  શમણે લાડ અપાર
એ દિવસે મેં બારી ખોલી, જોવા હાથ હજાર
આડા આવ્યા ઝળઝળિયાં, ને કંઈ દેખાયું નહીં
ગુરુજી હું તો ઠાલી ઊભી રહી

એક દિવસ મેં શમણું દીઠું,  ઊભી તમસા તીર
એ દિવસે મેં મુઠ્ઠી ખોલી,  પરસું નરવા નીર
આડા આવ્યા ચામડલાં, ને કઈ વરતાયું નહીં
ગુરુજી,  હું તો ઠાલી ઊભી રહી

એક દિવસ મેં શમણું દીઠું, શમણામાં ઘુઘવાટ
એ દિવસે મેં છાતી ખોલી, ભરવા મનનું માટ
આડા આવ્યા  ધબકારા, ને કંઈ સંઘરાયું નહિ
ગુરુજી,  હું તો ઠાલી ઊભી રહી….  

~ મીનાક્ષી ચંદારાણા

આજે ગુરુપૂર્ણિમા. આટલી સરસ ગુરુવંદના અને કવિએ ખુદ ભાવથી એનું ગાન કર્યું છે. સાંભળીએ.

‘સાંજને સૂને ખૂણે ‘ એમનો સરસ મજાનો કાવ્યસંગ્રહ. 

કાવ્ય : મીનાક્ષી ચંદારાણા સ્વર : મીનાક્ષી ચંદારાણા

*****

Sarla Sutaria * 23-07-2021 * મીનાક્ષી બેન જન્મજાત કવયત્રી છે. એમની ગઝલો અને ગીતો સાંભળવા ગમે એવા છે. આટલું સુંદર ગુરુવંદના ગીત વાંચીને આનંદ આનંદ ?

છબીલભાઈ ત્રિવેદી * 23-07-2021 * આજના ગુરુ પૂર્ણિમા ના પાવન અવસરે મિનાક્ષી બેન નુ કાવ્ય ખુબજ સમયોચિત ગુરૂ પદ તો અલૌકિક ભાવ છે આપણા દેશ મા તો ગુરુ નો દરજજો ઈશ્ર્વર કરતા પણ મહાન છે ખુબ અભિનંદન આભાર લતાબેન

ડો. પુરુષોત્તમ મેવાડા, સાજ * 23-07-2021 * ખૂબ જ સરસ ગુરુ વંદના, અદ્ભૂત ભાવ અભિવ્યક્તિ. ગાયન પણ સરસ લયબંધ.

દિનેશ ડોંગરે નાદાન * 23-07-2021 * મીનાક્ષી બેન અમારી બુધસભા અને કવિસંગત ના નિયમિત સભ્ય એમની કવિતા. એ જ એમની ઓળખ. ખૂબ સુંદર લખે છે. ગુરુવંદના ની આ રચના પણ એટલીજ સુંદર. અભિનંદન બંને બહેનોને.