બાલમુકુન્દ દવે ~ બંદો અને રાણી * Balmukund Dave
બાલમુકુન્દ દવે ~ બંદો અને રાણી
સીમને સીમાડે તને જોયો મારા બંદા !
પ્રીતચિનગારી પહેલી જોઈજી જોઈજી.
એકલ બપોરે તને જોઈ મારી રાણી !
અક્કલપડીકી મેં ખોઈજી ખોઈજી…..
આંબલાની હેઠ ગોઠ કીધી મારા બંદા !
હરખની મારી હું તો રોઈજી રોઈજી.
હોઠની ધ્રુજારી તારી પીધી મારી રાણી !
હેતભીની આંખ મેં તો લોઈજી લોઈજી…..
કંઠમાં ગૂંચાણી મૂંગી વાણી મારા બંદા !
નજરુંમાં નજર મેં પ્રોઈજી પ્રોઈજી.
વણબોલ્યા કોલ લીધા-દીધા મારી રાણી !
તાંતણે બંધાયાં ઉર દોઈજી દોઈજી…..
આંબલાની મેર ઝૂક્યો તુંય મારા બંદા !
ફેર ફેર મોહી તને જોઈજી જોઈજી
ઉરધબકાર એકતાર મારી રાણી !
ઊઠતા ઝંકાર એક સોઈજી સોઈજી…..
~ બાલમુકુન્દ દવે
પ્રિયાને જોઈ સાનભાન ભૂલનારા નાયક તો ઘણા પણ આ પ્રેમગીતમાં નાયક ‘અક્ક્લપડીકી’ ખોઈ બેસે છે ! આવા મજાનાં શબ્દો સાથે અમર ભટ્ટ અને હિમાલી નાયક વ્યાસનું મીઠું ગાયન પણ…
સૌજન્ય : અગસ્ત્ય ફાઉન્ડેશન
OP 7.3.22
કાવ્ય : સ્વરકાર: અમર ભટ્ટ ગાયક: અમર ભટ્ટ, હિમાલી વ્યાસ નાયક
***
સાજ મેવાડા
07-03-2022
ગામઠી વાતાવરણમાં પ્રાંગરતો પ્રેમ અને એવાજ શબ્દોમાં ગીત, વાહ. સ્વરાંકન પણ સરસ સીધું.
પ્રતિભાવો