વિજય સેવક

એક કે બે શ્વાસ ~ વિજય સેવક

એક કે બે શ્વાસ છે આ જિંદગી

મોતનો ઇતિહાસ છે આ જિંદગી……

દોડવું ને ભાગવું ને તૂટવું

એ જ તો સંત્રાસ છે આ જિંદગી…… 

આયનાથી બ્હાર આવી જો જરા

ભાસ, કેવળ ભાસ છે આ જિંદગી…..

આપણે વરસ્યાં અને ભીનાં થયાં

તો જ શ્રાવણ માસ છે આ જિંદગી…..

પોપડાં ખરતાં જતાં વરસો-વરસ

આપણો પરિહાસ છે આ જિંદગી……

ક્યાં સુધી હું શ્વાસને ગણતો રહું !?

આખરી અજવાસ છે આ જિંદગી…..

~ વિજય સેવક

જિંદગી કેવી છે?

કેટલાય લોકોએ એને કેટલી રીતે વર્ણવી હશે !

જે સમયે માનવીનું જેવું મન, એવી જિંદગી !  

*****

આ જ કવિની એક બીજી ગઝલ

વ્હેલી સવારે ટ્રેનમાં કચડાય એ પછી

હું કચકચાટ બાંધતો ઇચ્છાને ધૂંસરી…..

પ્હેરીને ડાબલા સતત ઘૂમ્યા કર્યું છે મેં

હાંફી ગયો છતાંય છે આ દોડ વાંઝણી……

તારા ગયા પછી જ હું પામી શક્યો મને

ખાલીપણું જ વિસ્તર્યું ‘તું મારા નામથી…..

ઑફિસ સમી છે આપણી આ જિંદગી વિજય

આખો દિવસ ચહલપહલ પણ સાંજ ઝૂરતી…..  

~ વિજય સેવક