મનોહર ત્રિવેદી ~ તમા રાખે વખતસરની* Manohar Trivedi

નિરાંતે એ જ ઊંઘે છે

તમા રાખે વખતસરની નિરાંતે એ જ ઊંઘે છે,
કરે પરવા ન બિસ્તરની નિરાંતે એ જ ઊંઘે છે.

અહીંથી ત્યાં, ઉતારો ક્યાં? નથી ચિન્તા થતી જેને-
હતી ના યાદ પણ ઘરની નિરાંતે એ જ ઊંઘે છે.

ક્ષણો જેવી મળી એવી સહજભાવે જ સ્વીકારી –
પ્રથમની હો કે આખરની, નિરાંતે એ જ ઊંઘે છે.

તમે ઈશ્વર વિશેના વાદમાં જાગ્યા કરો પંડિત!
ખબર રાખી ન ઈશ્વરની, નિરાંતે એ જ ઊંઘે છે.

કબીરે શાળ પર બેસી કહ્યું : મંદિર કે મસ્જિદને –
ગણે જે કેદ પથ્થરની નિરાંતે એ જ ઊંઘે છે.

પ્રશંસા કે પ્રતિષ્ઠાના નથી ઉદગાર બે માગ્યા
મજા જે લે છે અંદરની નિરાંતે એ જ ઊંઘે છે.

~ મનોહર ત્રિવેદી

મનોહરભાઈના ગીતો જેવી જ મનોહર આ ગઝલ ! ‘આજની ક્ષણમાં જીવો તો બસ નિરાંત જ નિરાંત છે’, આવી સરસ વાત પૂરી કાવ્યાત્મકતા સાથે કહી છે! કવિ ભલે પ્રશંસા ન માગે પણ આપ્યા વગર આપણને નિરાંતની ઊંઘ ન આવે!