જગદીશ જોષી ~ કોઈના અણસારે Jagdish Joshi
કોઈના અણસારે તમે દૂર જઈ બેઠાં
હવે પાસે આવો તો મારી આણ છે
તમને તો ઠીક, જાણે છબછબિયાં વહેણમાં,
પણ ઊંડા વમળાય તે આ પ્રાણ છે.
કોઈના હલેસાંથી વ્હેણ ના કપાય,નહીં
માપ્યાં મપાય વેણ પ્યારનાં :
દરિયાને નાથવાની લાયમાં ને લાયમાં,
કાંઠા તણાઈ ગયા ક્યારના
સઢના લીરા થી હવે બાંધી છો નાવ,એની
વાયરાને થોડી તો જાણ છે !
લીલીછમ વાડીમાં ગોફણનાં ઘાવ હવે
ઠાલા, હોંકારા હવે ઠાલા,
પંખી તો ટાઢકથી ચૂગે છે, આમ તેમ
ઊડે છે ચાડીયા નમાલા
વેલાને તાણો તો સમજીને તાણજો, કે
આસપાસ થડનીયે તાણ છે !
~ જગદીશ જોષી
લયના વિરહભર્યા વહેણમાં તાણી જતું એક અદભૂત ગીત!
ફોટો સૌજન્ય : ગુજરાતી પ્રતિભા પરિચય
કવિ શ્રી ના બન્ને કાવ્યો ખુબ સરસ ખુબ ગમ્યા અભિનંદન
આ કવિતાઓનું સ્વાગત છે
ખૂબ સરસ ગીત