શ્યામ સાધુ ~ ટૂંકા પડેલા અરીસામાં

ટૂંકા પડેલા અરીસામાં
વૃક્ષોની કવિતા નથી મળી આવતી !
મને અરીસામાં ટૂંકું પડે છે
એટલે મને
વેંઢારવાં પડે છે ગણી ન શકાય એટલાં
અનિશ્ચિતતાનાં વર્ષો !
આ પછી પણ
ટૂંકા પડેલા અરીસામાં

તે છતાં
વૃક્ષોની કવિતાનાં મૂળ સુધ્ધાં નથી હોતાં !
શું હું માની શકું,
ટૂંકા પડેલા અરીસા
કોઈ ઘેરી ઉદાસ એકલતાનું નામ છે ?
શું કોઈ અચાનક
તૂટી ગયેલી નાનકડી
ડાળીની ચીસ છે ?
એ જો હો તે,
આ તો ટૂંકા પડેલા અરીસામાં
તમને ઝીલી ના શક્યો એટલે
આ મન તમારા સુધી ફેલાવ્યું
અને
પહોંચાડી છે આ કવિતા…

~ શ્યામ સાધુ

ગઝલવિશ્વને રળિયાત કરનાર કવિ શ્યામ સાધુ અછાંદસ કવિતા પણ આપે છે.

અને આ છે એકલતાની કવિતા, ઉદાસીની કવિતા, પીડાની કવિતા…. વૃક્ષ, અરીસો એ બધાં બહાના…. કાવ્યની ભાષામાં કહીએ તો પ્રતીકો !

આમેય કવિના અરીસામાં એકલતા, ઉદાસી ન મળે તો જ નવાઈ !

આજે એ માનુષી એકલતામાંથી કવિની મુક્તિનો દિવસ.

આપણા સૌની સ્મૃતિવંદના