તારે પારણે – હાલરડું
તારે પારણે પોપટ બોલે છે,
તારે ઘોડીએ મોરલા ડોલે છે;
સૂઈ રો’ ને કાન !
હાલરડાં હુલરાવે જશોદા માવડી !
તારે હાલરડે હીરની દોરી
તુંને હુલરાવે જશોદા ગોરી;
સૂઈ રો’ ને કાન. – હાલરડાં….
કાના, કામ કરું કે તુજને તેડું !
મારે જાવું છે જળ જમના બેડું;
સૂઈ જાવ ને કાન. – હાલરડાં….
કાના, બારણે તે બોલે બાઘડિયા,
તારે પારણે ઘૂમે રસ મોરલિયા;
સૂઈ જાવ ને કાન. – હાલરડાં….
કાને વાછરું વાળ્યાં ને ગાવ દોવડલી,
ગોપી મહી રે થોડાં ને છાશ આવડલી,
સૂઈ જાવ ને કાન. – હાલરડાં….
મારે જાવું છે નરસૈ મે’તાને બારણીએ,
પ્રભુ આવી ઊભા મારે પારણીએ;
સૂઈ જાવ ને કાન. – હાલરડાં….
OP 18.4.22